Carlos Zollae' tu páaktaj u bejil xaak'al ku beeta'al yóok'olal bix u ts'aakankil máasewáal kaajo'ob

J xak'al xooke', jóok'sa'ab Argentina ka tu síijubáaj México, kíim el domingo máaniko'

Mónica Mateos-Vega
Oochelo'ob: Benjamín Flores / medicinatradicionalmexicana.unam.mx / Rodrigo Díaz Guzmán
K'iintsil

Jueves 17 ti' enero, 2019
Ciudad de México

U nu’ukbesajil Programa Universitario de Estudios de la Diversidad Cultural y la Interculturalidad (Puic) ku beeta’al tumen Universidad Nacional Autónoma de México (UNAM) yaan u beetik jump’éel chíimpolal ma’ tu xáantal, ti’al lingüista Carlos Zolla Luque, máax kíim le domingo máaniko’, leti’e’ tu beetaj u coordinadoril ti’ xak’al xook ku beeta’al te’e najil xooko’.

J xak’al xook Zollae’ jóok’sa’ab tu kaajal Argentina, ba’ale’ tu nacionalizartubáaj tu lu’umil México, yéetel u meyaje’ k’a’anan ti’al indigenismo yanchaj ti’ k noj lu’umil, tumen xaak’alo’ob tu beetaj, u ya’abile’ tu beetaj tu yóok’olal ts’aak ku beeta’al tumen máasewáal kaajo’ob, ts’o’okole’ le je’elo’ tu jets’aj jump’éel bej páatchaj u t’u’ulpachta’al tumen máaxo’ob meyajtik ba’al yóok’olal le je’ela’.

Ichil áanalte’ob tu beetaje’ ti’ yaan Los pueblos indígenas de México: 100 preguntas, meyaj tu múul beetaj yéetel u yaal Emiliano Zolla Márquez, tu’ux ku núukik ba’alo’ob je’el bix: ba’ax ku na’ata’al le ken a’alak máasewáal kaaj, jaytúul máasewáalo’ob yaan tu noj lu’umil México, jaytúul máasewáalo’ob yaan yóok’ol kaab, ba’ax u jela’anil ichil t’aan yéetel dialecto, ba’ax ku na’atal tu yóok’olal máasewáal cosmovisión, ba’ax ku na’ata’al tu yóok’olal multiculturalidad, pluriculturalidad yéetel interculturalidad.

Zolla Luque síij tu ja’abil 1945 tu kaajil Catamarca, Argentina, tu’ux tu ts’o’oksaj u xookil lingüística ti’ u noj najil xook Universidad Nacional de Córdoba. Tu noj lu’umil México k’uch tu ja’abil 1976 yéetel ka’aj máan jayp’éel ja’abo’obe’ tu síijubáaj ti’ le lu’uma’. Tu ts’áaj xook ti’ Facultad de Filosofía y Letras ti’ UNAM, tu’ux tu ch’a’aj u meyajt u yúuchben kaajilo’ob México.

Tu beetaj u j xak’al xookil u mola’ayil Instituto Mexicano para el Estudio de las Plantas Medicinales yéetel Instituto Mexicano del Seguro Social, beyxan tu beetaj u subdirectoril Bienestar Social yéetel tu jo’olbesaj Investigación y Promoción Cultural ti’ u mola’ayil Instituto Nacional Indigenista, te’elo’ tu jo’olbesaj u meyajil Estado del Desarrollo Económico y Social de los Pueblos Indígenas de México.
Tu múul patjo’oltaj yéetel tu múul jo’olbesaj tu tséel Arturo Argueta yéetel Soledad Mata Pinzóne’, u kúuchil xook Biblioteca de la Medicina Tradicional Mexicana, ba’ale’ walkila’ k’ajóolta’an beey Biblioteca Digital de la Medicina Tradicional Mexicana.

Beyxan, tu k’iinilo’ob úuchik u jo’olbesik u jaatsil xak’al xook ti’ Puic-UNAM, tu péektsiltaj u beeta’al yéetel k’a’aytal ich kaaj le científico ba’alo’ob ts’o’ok u yojéelta’alo’ob, beyxan ka k’ajóolta’ak kaajo’ob yéetel miatsilo’ob tu’ux beeta’ab le xaak’alo’obo’.

Tu ch’a’aj u meyajt jejeláas xaak’alo’ob ti’al u beetik tu juunal, ba’ale’ beyxan ti’al u múul beetik ichil jejeláas máako’ob meyajtik ya’abach uláak’ ba’alo’ob, tu’ux táakpaj mola’ayo’ob ti’ le noj lu’uma’, ba’ale’ beyxan ti’ táanxel lu’umo’ob.

Zollae’ ku tukultik ka’ache’, le ba’alo’ob ku yojéelta’al tu yóok’olal u máasewáal kaajilo’ob Méxicoe’ tajan ya’ab, “ichil miles u ya’alal”; ba’ale’, ku jach a’alike’, máasewáal tuukule’ jump’éel noj ba’al láayli’ ma’ k’ajóolta’ak tumen ya’abach u kajnáalo’ob tu lu’umil México, mix tumen mola’ayo’ob yéetel máaxo’ob ku meyajo’ob te’e kúuchilo’obo’.

J xak’al xooke’ ku ya’alike’, ma’atech u k’ajóolta’al tumen, yáaxe’, ku yantal ya’ab máak ku péech’ óolal wa ku p’íitkúunsik máasewáal kaajo’ob, le beetike’ beetchaj tak jump’éel nu’ukbesaj meyaj tu’ux ku kaxta’al ka’ach u p’éelililkíinsa’al miatsil, ts’o’okole’, ma’ chéen wa ba’ax k’ine’, mantats’ beey u beeta’al le ken jo’op’ok u yila’al bix u k’a’ayta’al ba’al yaan u yil yéetel máasewáal kaajo’ob.

Tu yóok’olal ts’aakankil suuk u beeta’al ich kaajo’obe’, Carlos Zollae’ ku tukultike’ “jump’éel ba’al k’a’anan ti’al ka ts’aatáanta’ak u toj óolal millonesil mexikanoilo’ob, ts’o’okole’ mantats’ le ts’aakankilo’ ku beeta’al tumen máako’ob k’ajóolta’ano’ob beey j meen (maaya), mara’akáme (huichol), h’ilol (tzeltales, tzotziles), ichil uláak’ k’aaba’ob”.

Ma’ yanchaj mix uláak’ juntúul máak je’el bix Zolla ti’al u je’ets’el jach bix u yúuchul ts’aakankil ich máasewáal kaajo’ob, ichilo’obe’, ku tsolik, leti’ u múul yantal yéetel ts’aakankil ku beeta’al tumen táanxel lu’umo’ob;

Tu ja’abil 2014e’, tu múul betaj yéetel José del Val, máax jo’olbesik Puic, j xak’al xook Zollae’ (máax ku boon xan ka’ache’) u yáax jaatsil u áanalte’il Documentos fundamentales del indigenismo en Mexico. Táan ka’ach u meyaj ti’ u ka’a jaatsil le áanalte’o’.

J ka’ansaje’ cremarta’ab le lunes máaniko’, yéetel u ta’ane’ tu p’aatal yiknal u láak’tsilo’obe’.