Tu'up u sáasil j k'aay tuukul k'iche' Humberto Ak'abal

Tu ja'abil 2003e' ma' tu éejentaj u k'u'ubul ti' Premio Nacional de Literatura 'Miguel Ángel Asturias'

PL
Oochel Facebook/Humberto Ak'abal
K'iintsil

Ciudad de Guatemala
Miércoles 30 ti' enero, 2019

Tu yáak’abil 28 ti’ enero, las 8 áak’ab tu kúuchil ts’akyaj San Juan de Dios, sa’at u kuxtal j maya k’iche’ ts’íib Humberto Ak'abal, máax yaan 67 u ja’abil ka’achij. Leti’e’ síij tu kaajil Momostenango, Totonicapán (1952) yéetel tu ts’íibtaj u jejeláasil k’aay tuukulo’ob yéetel u yóol u maaya ch’i’ibalil, u meyajo’obe’ j su’uto’ob ichil maanal junk’aal t’aano’ob.

U baatsile’ tu tsolaje’, kíim úuchik u talamchajal ba’al ti’ ka’aj ts’o’ok u beeta’al jump’éel cirugía intestinal tu k’iinil 27 ti’ le winala’, tu kúuchil ts’akyaj Totonicapán, ba’ale’ yanchaj u máansa’al tu kúuchil San Juan de Dios tumen ts’o’okili’ u talamchajal ba’al ba’ale’ ti’ sa’at u kuxtali’.

U soob, Yamilet Pérez Ak’abal, tu tsolaj jach táan u yaj óolta’al tumen tuláakal u baatsil, tumen ma’ tu páa’tajo’ob ka kíimik. “In tíoe’ káaj u yu’ubik ma’ uts u yóol tu k’iinil sábado, le beetik biinsa’ab tu najil ts’akyaj José Felipe Flores de Totonicapán”, tu’ux jach séeba’an úuchik u beeta’al cirugía ti’.

“Ts’o’okole’ ma’ k ojel ba’ax le talamchajti’o’, ba’ale’ a’alab to’on k’a’anan ka séeb su’utuk tu najil ts’akyaj yaan noj kaaj. Yanchaj k k’áatik jump’éel ambulancia tumen te’e najil ts’akyaj tu’ux yaan ka’acho’, ma’ chuka’an nu’ukulo’ob k’a’abéet ka’achij. Tu taal u yáak’abtal lunes ka t taasaj, ba’ale’ ma’ xáanchaji’, ka’alikil táan in wa’alik jayp’éel datose’, leti’e’ je’elij”.

J ts’íib jach k’ajóolta’an

Humberto Ak’abal síij tu kaajil Momostenango, Totonicpán tu ja’abil 1952. Juntúul ti’ le j k’aay tuukulo’ob asab k’ajóolta’an Europa, Estados Unidos, México yéetel Asia. U meyajo’obe’ suta’ano’ob ich francés, inglés, alemán, italiano yéetel uláak’ jo’olajun t’aano’ob.

Beyxan u k’aay tuukulo’obe’ ts’a’aban k’ajóoltbil ti’ pik’il ju’uno’ob ku jóok’sa’alo’ob Guatemala, Centro América, México, Estados Unidos, Venezuela, Brasil, Colombia, España, Francia, Austria, Suiza, Alemania yéetel Italia.

U áanalte’il Ajkem Tzij (Tejedor de palabras, 1996) jóok’sa’ab tumen UNESCO. U áanalte’il Guardián de la caída de agua ch’a’achibta’ab beey Libro del Año, ts’o’okole’ chíimpolta’ab xan yéetel Quetzal de Oro APG 1993 tumen u múuch’kabil Asociación de Periodistas Guatemaltecos.

Tu ja’abil 1995e’ k’u’ub ti’ tumen Facultad de Humanidades ti’ u najil xook Universidad de San Carlos de Guatemala u chíimpolalil Diploma emeritissimum. Beyxan Premio Internacional de Poesía Blaise Cendrars 1997, Neuchatel, Suiza yéetel Premio Continental Canto de América, ku ts’a’abal tumen UNESCO, 1998.

Tu ja’abil 2003 je’ets’ u ti’al u chíimpolalil Premio Nacional de Literatura Miguel Ángel Asturias, ba’ale’ leti’e’ ma’ tu éejentaji’, tumen, ichil ba’ax tu ya’alaje’ “jump’éel chíimpolal k’a’ap’éel u k’aaba’, yáaxe’ Premio Nacional, ts’o’okole’ le je’elo’ jump’éel yáax k’aaba’, ts’o’okole’, uláak’ jump’éel k’aaba’e’ Miguel Ángel de Asturias". Kex tumen u jaajile’, ma’atáan u éejentik ka’ach jump’éel chíimpolal ku k’u’ubul tumen le noj lu’um tu pech’aj u ch’i’ibal.

Tu béeykunsaj u náayil

Tu k’iinil 29 ti’ julio ti’ u ja’abil 2018e’, Akabale’ tu béeykunsaj jump’éel ba’al jach mantats’ tu yaayataj: u beetik jump’éel recital tu kaajal, Momostenango, le je’elo’ tu béeykunsaj tumen yanchaj junmúuch’ táankelem paalal táakano’ob ichil Tejedores de Pensamientos, máaxo’ob péektsiltik miatsil te’e kaajo’. U xookil k’aay tuukule’ ti’ j beeta’ab tu kúuchil Centro Cultural Momostipán.