Kíim yukatekoil j ts’íib k’aay 'Coqui' Navarro

Te amaré toda la vida, jump'éel u k'aayil asab k'ajóolta'an

Luis A. Boffil Gómez
Oochel ACOM
K'iintsil

Lunes 4 ti' febrero, 2019
Yucatán

J yukatekoil ts’íib k’aay k’ajóolta’an tak táanxel lu’umo’obe’, Enrique Novelo Navarro, Coqui, kíim tu k’iinil sábado tu noj kaajil Jo’, ka’alikil 84 u ja’abil ka’achij úuchik u jach máan k’iin k’oja’an.

Tu ts’íibtaj u paaxil boleros tu chowakil kex 60 jabo’ob. Te amaré toda la vida, u k’aaba’ jump’éel ti’ le k’aay tu beetaj asab k’ajóolta’an, tu ts’íibtaj tu ja’abil 1965, ts’o’okole’ jach ma’alo’ob úuchik u k’a’amal tumen aj u’uyaj máak.

Coqui síij tu noj kaajil Progreso, Yucatán, tu k’iinil 17 ti’ julio ti’ u ja’abil 1934. U na’e’, María Navarro Sanabria, x ka’ansaj ti’ piano, leti’e’ máax ti’ síiaj ti’ u yáax guitarra. Ka tu chukaj 15 u ja’abile’, tu much’ajubáaj yéetel ka’atúul u yéet paalil, René Frías yéetel Leopoldo García, ti’al u beetik u tríoil Los Porteños, múuch’il k’ajóolta’ab xan beey Los Panchitos.

Tu ja’abil 1958 tu ts’íibtaj u k’aayil Despierta, Paloma, k’a’ay tumen Lola Beltrán, Joselito, Armando Manzanero, Daniel Riolobos, Óscar Chávez, Los Montejo yéetel La Rondalla Yucateca, ichil uláak’ j k’aayo’ob. Tu ja’abil 1968 tu ts’íibtaj u bolerosil Hasta hoy yéetel Sé que te quiero, k’aay jach k’ajóolta’ab úuchik u k’a’ayal tumen Guadalupe Trigo. Tu ja’ail 1969, Marco Antonio Muñiz tu táabsaj u k’aayil No sé qué está pasando.

Ese fue tu error, Borraré tu nombre yéetel Si no te gusta cómo soy, k’aayo’ob ts’íibta’ab tumen Navarro, ba’ale’ k’a’ayo’ob tumen Lupita D’Alessio. Beyxan leti’ u yuumil Dichoso, Amor, Amantes de medio tiempo, Vas a sentir, Dilema, Sonríe, Cuando un amor termina, Yo lo conozco, interpretadas por Olga Guillot, Pedro Vargas, José Luis Rodríguez El Puma, Vicente Fernández y Javier Solís, entre otros.