IPNe' ku beetik nu'ukbesaj ti'al u ch'éejsik papiloma tu 100 por cientoil

Ku xu’ulsik ba’ax tsa’aysik k’oja’an yéetel ma’atech u jayikubáaj wíinkilal, ku ya’alik x xak’al xook

La Jornada Maya
Oochel Twitter IPN
K'iintsil

Ciudad de México
Martes 5 ti' febrero, 2019

Yéetel u yáantajil estudios moleculares, u kúuchil Instituto Politécnico Nacional (IPN) tu jets’aj páatchaj u luk’sik u 100 por cientoil u pak’be’enil Virus del Papiloma Humano (VPH), ts’a’ay ti’ u cérvix uterino 29 u túul ko’olelo’ob ti’ Ciudad de México, máaxo’ob ts’a’ako’ob yéetel terapia fotodinámica, jump’éel nu’ukbesaj ma’atech u jayikubáaj ichil u wíinkilalo’ob tumen ila’abe’ je’el u meyaj tu beel ti’al u yila’al ma’ u tsa’ayal le neoplasiaa’, tumen le k’oija’ana’ leti’ u ka’ap’éel ba’alil beetik u kíimil méexikanail ko’olel.

Ichil u máank’inal Día Mundial Contra el Cáncer 2019: Crea un Mundo sin Cáncer Cervicouterino, u x científicail Escuela Nacional de Ciencias Biológicas (ENCB), Eva Ramón Gallegos, tu tsolaj terapia fotodinámicae’ ku meyaj ti’al u xu’ulsik VPH (jump’éel agente patógeno beetik tsa’ayal cáncer cervicouterino), ba’ale’ ku ch’éensik xan lesiones premalignas ti’ u cánceril cérvix tu k’iinilo’ob jach táan u káajal, je’el bix úuchik u je’ets’el ti’ el yáax túuntaj xaak’alil.

X xak’al xooke’, máax ts’o’ok u máansik junk’aal ja’abo’ob káajak u xak’altik ba’ax ku yúucuhul yéetel terapia fotodinámica le ken k’a’abéetkunsa’ak ti’ jejeláas neoplasias (melanoma, cáncer tu yiim ko’olel yéetel cervicouterino), tu ya’alaj tu k’iinil táan u yantal fase clínica ts’o’ok u beeta’al le terapia je’ela’, ti’ 420 u túul k’oja’ano’ob yaan Oaxaca yéetel Veracruz, yéetel le uláak’ 29 ti’ Ciudad de México, máaxo’ob yaan ti’ob VHP, ts’o’okole’ táan u káajal u ye’esiko’ob lesiones premalignas ti’ cérvix wa ts’o’ok u yantal ti’ob le ka’ap’éel talamilo’oba’.

Tu tsikbaltaj nu’ukbesaje’, ka’a jaats úuchik u beeta’al yéetel ka’ap’éel nu’ukbesajo’ob u ts’a’abal tu súutukil terapia. “Te’e yáax jaatso’ -tu’ux táakbesa’ab ko’olelo’ob ti’ Oaxaca yéetel Veracruz- ba’ax chikpaje’ jach tu líik’saj k óol. Le ka’aj beeta’ab nu’ukbesaj yéetel u ko’olelilo’ob Ciudad de México láayli’ xan ma’alo’ob úuchik u jóok’ol, le beetik le je’elo’ ku taal u ts’áaj uláak’ bix u páajtalil u séebkunsa’al u meyaj le nu’ukbesajo’, le ken jo’op’ok u k’a’abéetkunsa’al nu’ukbesaj uts u ti’al bix yanik le k’oja’ano’”, tu ya’alaj.

X ts’akyaj Ramón Gallegose’ tu ya’alaj ti’ jump’éel terapiae’ ku ts’a’abal tu kaalil jump’éel ts’aak u k’aaba’ ácido delta aminolevulínico, tu jo’oloj kamp’éel hora ts’a’abake’ ku súutul protoporfirina IX, jump’éel sustancia química fluorescente ku múuch’ul ti’ células loobilta’an, ts’o’okole’ ku yáantaj ti’al ka luk’sa’ak, yéetel jump’éel rayo láser especiale’, chéen le k’aasil ba’alo’ob ts’o’ok u yantalo’ob te’elo’.

Tu yáax jaatsil xak’al xook beeta’abe’, óoxtéen úuchik u k’a’abéetkunsa’al tratamiento lalaj 48 horas a jujump’éelil, beyxan cha’ab u meyaj radiación le bix úuchik u k’a’abéetkunsa’al tumen le k’oja’ano’ yéetel yóok’olal le bix yanik. Beeta’ab xaak’alilo’ob ti’al u yila’al bix k’a’amik tumen k’oja’ano’ob yéetel jeel beeta’ab xak’al toj óolal ti’al u yila’al bix yaniko’ob. Leti’ le ba’ax chikapaja’: máaxo’ob paak’al ti’ob virus ts’o’okole’ ma’ úuchuk mix jump’íit loob ti’obe’, béeychaj u luk’sa’al VPH tak tu 85 por cientoil; ichil máaxo’ob tsa’aytio’ob VPH yéetel ts’o’ok u yúuchul loobti’obe’, nu’ukbesaje’ tu beetaj utsilt tak tu 85 por cientoil, yéetel ichil máaxo’ob ts’o’ok u yúuchul loobti’ob kex mina’an VPH tu beetaj utsil tak tu 42 por cientoil.

U x xak’al xookil IPNe’ tu ya’alaje’, ti’ u ko’olelilo’ob Ciudad de México ka’atéen úuchik u ts’a’abalti’ob ácido delta aminolevulínico. Nu’ukbesaje’ j ts’a’ab ti’ob p’al máanik 48 horas. Beeta’ab xan u xak’al toj óolal ti’al u yila’al bix yaniko’ob. Leti’ le ba’ax chikapaja’: Béeychaj u luk’sa’al VPH tu 100 por cientoil máaxo’ob k’oja’ano’ob ts’o’okole’ mina’an mix jump’éel loobilti’ob, 64.3 por cientoil ichil ko’olel tsaayati’ob VPH yéetel yaan loobilajti’ob, yéetel 57.2 por cientoil ichil máaxo’ob yaan loobilajti’ob kex mina’an VPH.

Ma’ili’ ts’a’abakti’ob terapia fotodinámica ti’ k’oja’anobe’, beeta’ab u xak’alilo’ob colposcopía, citología (papanicolau), captura de híbridos, Reacción en Cadena de Polimerasa (PCR) yéetel biopsia ti’al u yila’al wa mina’an lesiones premalignas wa infección yéetel VPH. Tu ts’ook nu’ukbesaje’ jeel beeta’ab xaak’alo’ob yéetel ila’ab u yutsil meyaj beetchaji.

Xts’akyaj Eva Ramón Gallegos ts’o’ok u béeykunsik uláak’ noj xáak’abo’ob yóok’olal le je’ela’, ichil múul meyaj yéetel Elizabeth Maldonado Alvarado beyxan María Teresa López Cárdenas (máaxo’ob tu k’amajo’ob u doctorado’ob yéetel le meyaja’), Alejandro Martínez Escobar (maestría), Araceli Espinosa Montesinos (u x xak’al xookil Ginecología del Hospital Regional Ignacio Zaragoza del ISSSTE), Adriana Jiménez Hernández (estancia posdoctoral-Conacyt), Martha Olivia Osorio Peralta (citóloga ti’ Instituto Estatal de Cancerología de Guerrero), Alejandra Moreno Vázquez (u x xak’al xookil patología ti’ Centro Médico Nacional Siglo XXI del IMSS) yéetel Lydia Alejandra Martínez Guzmán (Máax jo’olbesik Laboratorio de Captura de Híbridos de Secretaría de Salud de la Ciudad de México).

Te’e xaak’alilo’ táakpaj xan: Marco Antonio Amoroso Hernández yéetel Ángel Laguna Cancino (Oaxaca) yéetel Dora Estela Jovel Galdamez, Bárbara Carrión Solano, Guadalupe Balderas Martínez; Eduarda Parra Rossana, Inés Castellanos Oliveros, Rosa Linda Bello Leiva, Ma. Eugenia Melo Petrone, Gumaro Narciso Morales yéetel Petrona Jiménez Martínez (Veracruz).