Facebooke' tu k'alaj joolnaj ti' its'at taak u k'i'itbesa'al tumen u kúuchil e'esajil Ginebra

ma' tu cha'aj u na'aksal tumen chaknul ba'ax ku chikpajali'

La Jornada Maya
Oochelo'ob
K'iintsil

Miércoles 6 ti' febrero, 2019

U kúuchil e’esaji yaan tu lu’umil Ginebrae’, tu ts’áaj k’ajóoltbil Facebooke’ ma’ tu cha’aj u ye’esik u yoochel Venus óoli’ laj chaknul yanik yéetel uláak’ jump’éel tu’ux ku chikpajal juntúul xiib xolokbal, tumen kúuchil e’esajile’ táan ka’ach u páa’tik ka béeyak u na’aksik ti’ le red socialo’, ti’al u k’a’aytik jump’éel e’esajil ma’atáan u xáantal ken ts’a’abak k’ajóoltbil.

Museo de Arte e Historia ti’ le lu’umilo’, tu k’a’abéetkunsaj Twitter ti’al u ya’alik taak ka’ach u k’a’aytik u ye’esajil César y el Ródano, yaan u xáantal óoxp’éel winal yéetel uláak’ táan chúumuk, tumen ti’ le viernes ku náats’ala’, yaan ka’ach u k’a’abéetkunsik le oochelo’oba’, ba’ale’ Facebooke’ “ma’ tu cha’aj k beetiki’, tumen ku chikpajal chaknul máaki’”. Kúuchile’ tu na’aksaj oochelo’ob yéetel u ts’íibil “censurado” ichik u t’aanil fránces, yóok’ol wíinkilal ku tukultiko’ob ma’ unaj u yila’ali’. “Míin k’uch u k’iinil u k’e’exel bix u ch’a’anuktik políticas Facebook ti’al kúuchilo’ob e’esajil yéetel kúuchilo’ob meyajtik miatsil”.