Uláak’ medios, uláak’ maaya kúuchilo’ob k’a’aytajil

Sásil Sánchez Chan
Foto: LJM
La Jornada Maya

Lunes 25 de febrero, 2019

Bix taak k kuxtal. Bix tak k chikbesikbáaj ichil ba’ax bak’pachtiko’on. Bix u bin u péek k t’aan, k maayat’aan, ti’ yóok’ol kaab mantats’ táan u k’éexel yéetel táan u xíimbal. Chéen jayp’éel ti’ le ba’axo’ob kin k’áatchi’ibtik ti’al ka páatak in tukultik ba’ax ku taal u k’iin yéetel in t’aan, wa k tukultike’, to’on je’ex maaya’one’, ti’ kuxa’anon ichil jump’éel chuka’an yóok’ol kaab tu’ux kuxa’an xan uláak’ tuukulo’ob táan xan u múul xíimbalo’ob yéetel u máan k’iin.

Le ken beeta’ak u juum jump’éel t’aan tumen u kaajile’, ku p’áatale’, leti’ u bejil ti’al u na’atikubáaj máak, ba’ale’ kex beyo’, k’a’anan ka u chúuns u túulisil kuxtal, ka u chúuns le ba’ax je’el u beetik ka páatak u k’a’abéetkunsa’al sáansamal yéetel je’el tu’uxake’ tumen máaxo’ob beetik u juum, kuxtale’ sáansamal u yantal le ken yanak t’aan, ba’ale’ ku viralizar, wa ka t’aanako’on je’el bix suuk u beeta’al yóok’lal ba’alo’ob yaan u yil yéetel redes socialese’, le ken ts’íibta’ak, le ken xo’okok.

Unak k na’atike’, u nu’ukbesajilo’ob k’a’aytajil péektsilo’ob wa medios de comuniacióne’, leti’e’ ba’ax ku k’a’abéetchajal beey nu’ukulil, beey u bejil, jump’éel ti’ ya’ab yane’, ti’al u chan k’éexel u yóol máaxo’ob mix juntéen béeyak u náats’alo’ob ti’ k t’aan; ba’ale’ beyxan ti’al k ch’a’ak xan beey u bejil ti’al k e’esik ti’ kaaj yéetel ti’ máax náach yanike’, mediose’ u ti’alo’ob xan. ¡Buka’aj ma’alo’obil ka yanak jump’éel u canalil máaben cha’an tu’ux ka úuchuk t’aan chéen ich maaya, ka páatak u k’a’ayta’al péektsilo’ob, ka tsikbalta’ak jats’ boola, ka yanak “novelas” -ichil u tuukulil ka yanak u jejeláasil ba’al cha’antbil- ich maayat’aan; wa ka juumnak radio, ba’ale’ ka náachchajak u juumil u frecuencia, tu’ux ka yanak péektsilo’ob ich maaya, beyxan u jejeláasil nu’ukbesajo’ob ti’al je’el máaxak máakile’, je’el ba’axak súutukil, tu’ux ka yanak paax, kaambal yéetel jejeláas ba’al ich maaya; beyxan ka yanak pik’il ju’un, ba’ale’ ma’ chéen junwáali’, ka xo’okok cómics, u wáalil náaysaj óol, editorial, u jaatsil péektsil yóok’lal yóok’ol kaab, ba’ax ku yúuchul ti’ k lu’umil, u xo’okol báaxalo’ob, tuláakal, ich máayat’aan! Je’el bixake’, ka yanak u kúuchilo’ob k’a’aytajil ba’ale’ ich maaya. U jaajile’, buka’aj u ma’alo’obil. Ba’ale’ ti’al ka úuchike’, in k’áat in tukult ma’ tsaj ka yanak u tsolikubáaj ka’an, mix ka yanak u t’a’anal báakabo’ob tumen jmeeno’ob, wa ka yanak u jeel síijil Kan Eek’ ti’al u ba’atel beey juntúul noj k’atun tu yóok’lal… Míin óoli’ beey ka tukulta’ak ka páatak u yantal a’almaj t’aano’ob yéetel mokt’aano’ob ti’al u táakmuk’ta’al u páajtalil u yantal kúuchilo’ob k’a’aytajil ichil t’aan k beetik.

U jaajile’, a’almaj t’aano’ob yéetel mokt’aano’obe’ ts’o’ok u beeta’alo’ob: Noj A’almaj T’aanil u Páajtalil u T’a’anal Máasewal T’aano’ob ich Maaya yéetel Káastelan T’aan, tu’ux ku ya’alik, tu wakjaatsile’: Le Noj Jala'achilo' yaan u kaxtik yéetel yaan u beetik u ts'áakuba meyaj le nu'ukulilo'ob u ts'a'abal ojéetbil ba'ax ku yúuchulo' utia'al u ya'aliko'ob u jaajil yéetel u jejeláasil t'aano'ob yéetel miaatsilo'obil le Noj lu'umila'; wa u mokt’aanil 169 ti’ OIT, tu’ux ku ya’alal ti’ u jaatsil waklajune’: Noj Jala'achile’ yaan u beetik tuláakal ba’ax k’a’abéet ti’al ka e’esa’ak u jejeláasil máasewáal miatsilo’ob yaan ti’ le nu'ukulilo'ob u ts'a'abal ojéetbil ba'ax ku yúuchul. Noj Jala'achile’, unaj u ts’aatáantik ka páatak u yantal libertad de expresión, unaj u ts’áak u yóol privado kúuchilo’ob k’a’aytiko’ob péektsil ti’al xan u ye’esiko’ob máasewáal miatsil.

Ba’ale’, le a’almaj t’aano’oba’ chéen ti’ p’aatalo’ob ti’ ju’un, ma’atech u jaajkunsa’al ichil u sáasamalil kuxtal máasewáal kaajo’ob.

Ba’ax ku xo’okol ich máasewáal t’aano’obe’, tak walkila’, chéen ti úuchben ts’íibo’ob p’aatal, ti’ woojo’ob, áanalte’ob -jayp’éel ti’ le je’elo’obo’ túumben beeta’anilo’ob, ts’o’okole’ jach ma’alo’ob- yéetel tak ma’ seen úuche’, ti’ kúuchilo’ob je’el bix redes sociales. Le beetike’, k’a’anan u ya’abtal, k’a’anan k náachkunsik k t’aan; estela’obe’, unaj u súutulo’ob pik’il ju’uno’ob, woojo’obe’ unaj u súutulo’ob its’at, úuchben ts’íibo’obe’ unaj leti’e’ ts’íibil ku beeta’al ti’ whats, Telegram wa Facebook ich maaya; u juumil juub ku t’aan ka’ache’, unaj u kíilbal yéetel u juum radio wa máaben cha’an.

Ti’al ka béeyak u yúuchul le je’elo’, to’on máaxo’on k t’aane’, to’on máaxo’on líik’o’on yéetel uláak’ páajtalilo’obe’, je’el bix jump’éel jach k’a’anan, u kanik máax xook yéetel ts’íibe’, unaj k beetik ka yanak xan le páajtalilo’oba’ ti’ máaxo’ob mina’an. Le je’ela’, ma’ ti’al k k’exik u tuukulio’ob, mix ti’al k occidentalizartik kaaj, chéen u ti’al k ts’áak uláak’ páajtalil ti’ob ti’al u múul xíimbalo’ob yéetel yóok’ol kaab. K’a’anan k k’a’abéetkunsik k t’aan, k’a’anan k a’alike’ u yantal kúuchilo’ob k’a’aytik péektsilo’obe’ jump’éel k páajtalil, ba’ale’ chéen wa ku yantal je’el bix k’a’anane’.

U ts’ooke’, taak in jeel k’áatik ka jaajkúunsa’ak u páajtalil u yantal kúuchilo’ob k’a’aytik péektsilo’ob ich maaya, tumen u jaajile’, ma’ in k’áat chéen jonjon súutuko’ob u ti’al; in k’áate’ ka yanak túulis kúuchilo’ob ich maaya.

sasil@lajornadamaya.mx