U ayik'alil Los Pinose', ma' tu ke'etel yéetel xuup beetchaj yóok'lal naj p'ata'ab tumen Manuel Ávila Camacho

Nojoch naje' líik'sa'ab tu kajtalil La Herradura

Mónica Mateos-Vega
Oochelo'ob Pablo Ramos / grandescasasdemexico.blogspot.com
K'iintsil

Martes 26 ti' febrero, 2019
Ciudad de México.

Ba’ax ku ya’alal yóok’lal u ayik’al kuxtal u jala’achilo’ob México ti’ u kúuchil Los Pinos (tu’ux mina’an mixba’al walkila’) ku taal u chikpajal beey chéen jump’éel u báaxalil paalal tu táan u nojoch najil Residencia Soledad Orozco, ayik’al kúuchil ti’alinta’an tumen u Jala’achil México, tu’ux tak walkila’ ma’ a’alab mix ba’al wa ba’ax ku taal u k’iin yéetel.

Kúuchile’ líik’sa’ab tumen Manuel Ávila Camacho, úuchik u ts’o’oksik u beetik u jala’achil tu ja’abil 1946, te’e tu’ux yaan ka’ach u kajtalil La Herradura, ts’o’okole’, le k’áaxo’ ja’atsij ti’al beyo’ u ko’onol jun jaats ti’ yaanal máako’ob, ti’ u ja’abil 1962.

Arquitecto Rafael Fierro Gossmane’ ku tsikbaltik ti’ u kúuchil Internet Grandes casas de México bix úuchik u yúuchul ba’al ti’ le ayik’al najo’, tumen yanchaj u k’iinile’, ti’ j p’áat u jach k’a’ananil priístailo’ob, ti’ u ka’a búujil siglo XX, ts’o’okole’ tu ja’abil 2000 x mukul k’a’abéetkunsa’ab tumen Vicente Fox, Felipe Calderón yéetel Enrique Peña Nieto.

“Manuel Ávila Camacho López, u yaal j k’atun Maximino Ávila Camacho yéetel u ts’ée’ yaal yuum Manuele’ ku tsikbaltik le je’ela’: ‘u k’áaxilo’ob La Herradurae’ j si’ib ti’ in ts’ée’ yuum tumen jala’ach Pascual Ortiz Rubio, beyxan leti’e’ tu síij ti’ in yuume’ u k’áaxilo’ob Batán’.

“K’iin úuchik u yantal ‘presidentes-militarese’’, yéetel k’áaxo’ob ku bo’otal u beeta’al páaboro’ob, beey úuchik u bo’otal j ts’akyaj Octavio Mondragón tumen jala’ach Ávila Camacho, úuchik u tojkíinsa’al u yóol úuchik u loobilta’al tu winalil abril ti’ u ja’abil 1944, j si’ib ti’ jump’éel naj ti’ yaan Lomas de Chapultepec (Sierra Fría 260, tu ti’itsil Aconcagua)”, beey u ya’alik u bloguil Fierro.

Beey túuno’, te’e ts’íibo’ ku ya’alike’, ka j ts’o’ok u meyaj Ávila Camachoe’ tu múul jets’aj yéetel u yatane’, k’a’anan u jeel líik’siko’ob “u najil le kajtalilo’”. Le beetike’ tu k’ubéentajo’ob ti’ arquitecto Manuel Giraud Esteva u jeel bo’onol u woojil. Ti’al u ja’abil 1947 u nojoch najil La Herradurae’ ts’o’ok u ts’o’oksa’al.

Te’elo’, yaan u nojoch táankabilo’ob yéetel u ja’il, ti’ páanan tu’ux yaan ka’anal k’áax ti’ le solaro’, bak’pachta’an tumen pinos, cedros, eucaliptos yéetel palmeras, ts’o’okole’ yaan xan tu’ux u ts’a’abal kis buutso’ob yéetel yaan tu’ux u yantal guardias yéetel jardineros.

Jats’utskúunsa’ab ichil, tumen u yatan Soledad Orozco, u yatan Ávila Camachoe’, beey úuchik u k’áatik. Le beetik t’a’an diseñador Harry Bloc, máax tu ts’áaj u mueblesil yéetel u tuukulil Période Dorée ti’ u sigloil XIX, yéetel u muebles francesilo’ob ti’ u k’iinilo’ob Luis XV yéetel XVI, beyxan yéetel u porcelanail Sèvres yéetel Meissen”.

Ichil u jaatsilo’ob beeta’ane’, ku jach chikpajal Gran Salón, ku p’isik 140 metros cuadrados yéetel ka’atéen u ka’analil, jats’utskíinsa’an yéetel ayik’al ba’al, tu’ux ku chikpajal candil ti’al 60 sáasilo’ob yéetel uláak’ ka’ap’éelo’ob tipo monumental, beyxan jump’éel u nojochil póop Aubusson yéetel jejeláas u nu’ukulil ch’oj porcelana, yéetel bronce ti’al u jats’utskíinsa’al u beel buuts’ te’e najo’, beey ts’íibta’an ti’ u kúuchil Grandes casas de México.

Kaabale’, ti’ yaan jump’éel nojoch kúuchil, tu’ux yaan jump’éel nojoch mayak che’ ti’al waklajun máak, jump’éel galería, u despachoil yuum Manuel, u kúuchil áanalte’ob, jump’éel familiar kúuchil, ascensor, estudio, u kúuchil u yuk’ul máak, patio interior, k’óoben, u kúuchil ti’al u líik’sa’al depensas yéetel bodegas, beyxan ti’al u yantal aj meyajo’ob yéetel u eebil ti’al u k’a’abéetkunsa’al tumen aj meyajo’ob.

Tu k’iinil jach táan u k’a’abéetkunsa’al beey naje’, ku ts’íibta’al ti’ bloge’, kuxlaj Eleanor Roosevelt, Rita Hayworth yéetel Dolores del Río, ba’ale’ beyxan máako’ob je’el bix u duquesil Windsor, príncipe Felipe de Edimburgo yéetel Bernardo de Holanda, Fulgencio Batista, Harry S. Truman, Orson Welles, Carlos Pellicer, Juan Rulfo yéetel José Clemente Orozco.

“Manuel Ávila Camacho kíim tu k’iinil 13 ti’ octubre ti’ u ja’abil 1955; ka chan máan k’iine’, xunáan Soledad Orozcoe’ tu túuxtaj beetbil jump’éel chan capilla, óoli’ beey mausoleo ti’al u yíicham (ba’ale’ ma’ tu k’a’abéetkunsaji’). Líik’sa’ab tu ja’abil 1957 úuchik u p’isbalta’al u ts’o’oksa’al jump’éel u meyajil arquitecto Juan Sordo Madaleno.

Walkila’, ts’o’ok u máan 22ja’abo’ob kíimik xunáan Soledad Orozco, ts’ook ba’ax tu k’áataje’ ma’ beeta’ak je’el bix tu ya’alaj, tumen ma’ chíimpolta’ak u t’aan tumen u jala’achilo’ob México.