Káax k'áak' ti' xuul lu'umil

Úuchak u lúuk’sa’al péepen k’áake’, ku yantal sajbe’entsil yóok’lal Cachemira

Afp
Infografía Graphic News
K'iintsil

Islamabad.
Jueves 28 ti' febrero, 2019

K’uux óol yaan ichil India yéetel Pakistáne’ táan u bin u nojochtal tu yóok’lal ba’ax úuch miércoles máanika’, tumen kaada juntúule’ tu ya’alaje’ tu lúubsaj u péepen k’áakil u “k’uux lu’umtanba’ob”, úuchik u ba’atelo’ob tu xuul kaajil le ka’ap’éel noj lu’umo’oba’, kex tumen leti’obe’ ku ya’aliko’obe’ ma’ u k’áat u noj ba’alkúunso’ob “ba’ateli’”.

K’uuxil káaj u nojochchajal le martes máanika’, tu yoksaj sajbe’entsil ichil táanxelil kaajo’ob, tumen táan u tukultiko’obe’ je’el u súutul beey ba’ateltáambal ichil le ka’ap’éel noj lu’umo’oba’, tumen táan u ba’atetiko’ob u k’áaxil Cachemira, tumen ts’o’ok u máan k’iin ma’ u ch’aob u t’aanil yóok’lal bix ku p’áatal k’áax ichilo’obi’.

U yáax ministroil paquistaníile’, Imran Khan tu ya’alaj chi’ichnak yóok’lal ba’ax táan u yúuchul: Je’el wáaj túun u páajtal k beetik wa ba’ax ma’ jach tu beel yéetel u jejeláasil ts’oono’ob yaan to’on yéetel yaan te’ex, tu k’áataj yóok’lal u ya’abil armas ku k’a’abéetkunsa’al tumen le ka’ap’éel lu’umoba’.

“Wa ba’atel táan u káajal te’ela’, tak tu’ux bíin náakak túun, tu k’áataj úuchik u tse’ek ti’ máaben cha’an le miércoles máanika’, ti’al u páayt’antik xan Nueva Delhi “ti’al ka kulako’ob u tsikbalto’ob”.

Tu ja’atskabil le miércoleso’, u x ministrail india yóok’lal Relaciones Exteriorese’, Sushma Swaraj, t’aanaj xan utsil ti’al ka yanak jets’ óolal, tumen ka’alikil ti’ yaan Chinae’ tu ya’alaje’ Indiae’ ma’ u k’áat ka yanak ba’ateli’”.

Káaj u nojochtal ba’al te’e baanta’o’, úuchik u je’ets’el, tu k’iinil martes, tumen ejército indioile’, tu beetaj bin jump’éel “ataque preventivo" yóok’ol jump’éel k’áax tu’ux táan u ka’ansa’al u islamista múuch’il Jaish-e-Mohammed (JeM) tu lu’umil Pakistán.

Ma’ach u pilotoil

U fuerzas armadasil Pakistáne’, tu jets’ajo’ob le miércoles máanika’, tu lúubso’ob ka’ap’éel u péepen k’áak’ilo’ob ba’ateltáambal ichil u k’áaxil tu’ux ku líik’siko’ob péepen k’áak’, ku tukulta’ale’ jump’éele’ ti’ jlúub tu tséel u indio k’áaxil Cachemira yéetel uláak’e’ ti’ u paquistaní tséelil

Pakistáne’ tu machaj túun ka’atúul piloto’obe’, ts’o’okol juntúule’ yanchaj u biinsa’al tu kúuchil ts’akyaj, ba’ale’ ma’ xáanchaj ka je’ets’ ti’ Twittere’ chéen “juntúul piloto” u machmajo’ob.