K'askúunta'an, tuláakal k'áak'náabo'ob

Ti’al 2050e’ plásticoe' yaan u píitmáansik u kayilo'ob k'áak'náab: aj xak’al xooko

Afp y PL
Boonil María León
K'iinitsil

Viernes 1º ti' de marzo, 2019
París, Francia

Aj xak’al xooko’obe’ tu ya’alajo’obe’, ichil 50 yéetel 100 por ciento ti’ le ba’alche’ob kaja’ano’ob tu taamil k’áak’nabo’obe’ ku jaantiko’ob plástico, beey ts’a’ab k’ajóoltbil tu k’iinil miércoles tumen u pik’il ju’unil Royal Society Open Science.

Yáax juntéen úuchik u kaxta’al microplásticos, tumen junmúuch’ aj xak’al xooko’ob, tu wíinkilal minicrustáceos kaja’ano’ob tak blukp’éel kilómetros tu taamil ja’, leti’ ba’ax e’esike’ mix jump’éel u ecosistemail ja’ jumpáay yanik ti’ kaskúunsajil.

U aj xak’al xookilo’ob Universidad de Newcastle tu k’a’abéetkunsajo’obb u kúuchil tu’ux ku jáayal ba’al ti’ u taamil k’áak’náab, ti’al u jóok’siko’ob u túuntajil ba’alche’ tu xak’altajo’ob, tu’ux ila’abe’ ichil u choochel 90 u túul ba’alche’obe’ yaan u xéexetaj mejenplástico jach chichan.

Te’e xak’al xooko’, ila’abe’ yaan plástico ku jaanta’al tumen u anfipodoilo’ob Lysianassoidea, ti’ wakp’éel fosas oceánicaso’obe’ ti’ tuláakal u jáalil Pacíficoe’ (Japón, Izu-Bonin, Mariana, Kermadec, Nuevas Hébridas y las trincheras Perú-Chile), tu taamil 7 mil tak 10 mil 890 metros.

Maanal ti’ u 72 por cientoil ti’ le ba’alche’ob xak’alta’abe’ yaan tu wíinkilal kex jump’éel chan micropartícula wa tak waxakkp’éel.

Ba’ax ojéelta’abe’, míin ku taal u ye’ese’ “ma’ p’aatal mix jump’éel u ecosistemail ja’ tu’ux mina’an kex jach jump’íit u xiixil antropogénicos", beey úuchik u ya’alik Alan Jamieson, máax jo’olbes xaak’alil.

Náach k’iin ken ila’ak u k’aasil

Tu ya’alaje’, u kaxta’al “u ya’abil le k’aasil ba’alo’oba’ ti’ jump’éel tu’ux náachchaja’an ti’ Yóok’ol Kaab”, tumen u ye’esajil “loobilaj táan u beeta’al ti’ lu’um tu’ux yano’on tumen tak náach k’iin ken chikpajak u k’aasil”.

J xak’al xooke’ tu ya’alaje’ kex tumen ts’o’ok u máan 60 ja’abo’ob káajak u yantal plásticoe’, te’e ja’abo’obe’ ts’o’ok u yantal kex 8 mil 300 millonesil toneladas, óoli’ tuláakal le je’elo’, láayli’ ti’ yaan Yóok’ol Kaabe’, u ya’abile’ chéen u xiixel.

Ma’ ya’ab plásticoso’obi’, ma’ k’ucha’an mix u 9 por cientoili’, ku jeel k’a’abéetkunsa’al, ts’o’okole’ le je’elo’ u k’áat u ya’ale’, láayli’ u seen beeta’al plástico sáansamal.

Walkila’ yaan kex 300 millonesil toneladas plástico ti’ k’áak’náabo’ob, le beetike’ sajbe’entsil yanik tuláakal ba’ax kuxa’an ich ja’, ku ya’alik j xak’al xooko’ob.

Ku ya’alale’ ti’al 2050e’ plásticoe' yaan u píitmáansik u kayilo'ob k'áak'náab.

Nailón, polietileno, PVC...

Nailón, polietileno, PVC, seda sintética... Ichil tuláakalo’obe’, 65 u túulale’, ku ye’esik maanal ti’ u 72 por cientoile’, yaan kex jump’éel micropartícula.

"Táan ka’ach in pa’atik in wilik wa ba’ax, ba’ale’ ma’ táan in pa’atik ka chikpajak jach tu cien por cientoil, tumen ila’abe’ yaan u fibrasil plástico tu wíinkilalo’ob. Jach noj ba’al”, tu tsolaj Jamieson.

J xak’al xooke’ ma’ suuka’an u meyaj yóok’lal ba’alo’ob yaan u yil yéetel u k’askúunta’al k’áak’náab, leti’e’ ku meyajtik submarina xaak’al.

Ba’ale’ tu múuch’meyajile’ yaan jayp’éel anfípodos tu molajo’ob ichil u ja’abil 2008 yéetel 2017, yéetel u yáantajil trampas ts’a’ab tu taamil le ja’o’.

Le beetike’, tu yóotajo’ob u beetiko’ob uláak’ ba’alo’ob yéetelo’ob, ti’al u yáantik u yojéelta’al uláak’ ba’al tu yóok’lal.