Aj xak'al xooko'obe' ku ya'aliko'ob chéen 22 u túul vaquita marina p'aatal México

Tukulta'ane' chéen ichil 12 wa 15 yaan ka'achij

Ap
Oochel toltecayotl.org
K'iintsil

Viernes 8 ti' marzo, 2019
Ciudad de México

Walkila’, tu k’áak’náabil Golfo de California, chéen p’aatal 22 u túul u ba’alche’il vaquitas marinas. Chéen ti’ le k’áak’náab je’elo’ kaja’an u asab chichanil marsopa yaan, ts’o’okole’ sajbe’entsil yanik u ch’éejel, beey úuchik u ts’a’abal ojéeltbil miércoles máanik.

Juntúul ti’ le j xak’al xooko’, Jorge Urbán, tu tsikbaltaj miércoles máanika’, u múuch’il máako’ob xak’altik jejeláas ba’al yóok’lalo’obe’, tu ya’alajo’ob páatchaj u jets’iko’ob yaan 22 vaquitas marinas yéetel u yáantajil monitores acústicos ku meyajo’ob ich ja’, le nu’ukulo’oba’ k’ajóoltano’ob xan beey Mar de Cortez.

U xookil jaytúul ba’alche’ p’aatale’ asab ya’ab ti’ le tukulta’an yaan ka’achij. Aj xak’al xooko’obe’ ku tukultiko’obe’ chéen yaan ichil lajka’túul wa jo’olajuntúul vaquitas marinas, ichil bix u bin u na’atal u ch’éejelo’ob. Ba’ale’ úuchik u yila’al asab ya’ab yaane’, ku ye’esik ba’alche’e ma’ neets kuxtali’.

J chuk kayo’obe’ yéetel u jaajil u yóolo’obe’, ts’o’ok u yaktáantiko’ob u ts’ook múuch’il táan u meyaj ti’al u kaláanta’al vaquita marina, Sea Shepherd.

U cheemilo’ob Sea Shepherd ku kóoliko’ob reedes ts’a’aban ti’al u chu’ukul totoaba, juntúul kay tajan ki’ u yu’ubal China. Ba’ale’ vaquitas marinase, le ken máanako’obe’, ku t’i’ilo’ob ts’o’okole’ ku kíimilo’ob.