Ti' Michoacáne' ku k'askúunta'al 65 mil hectáreasil k'áax ti'al u pa'ak'al oom

Ya'ab loobilaj ku beeta'al ti' yóok'ol kaab

Ernesto Martínez Elorriaga
Oochel Fernando Eloy
K'iintsil

Morelia, Michoacán
Lunes 11 ti' marzo, 2019

Ti’ le ts’ook waxak lajun ja’abo’obe’, tu lu’umil Michoacáne’ sa’at kex 65 mil u hectáreasil k’áax úuchak u k’a’abéetkunsa’al ti’al u pa’ak’al oom, ba’ale’ le je’elo’ ya’ab k’aasil ts’o’ok u beetik ti’ yóok’ol kaab, beey je’ets’ tumen aj xaak’al máako’ob.

Ricardo Luna García, máax jo’olbesik Secretaría de Medio Ambiente, Recursos Naturales y Cambio Climático (Semarnacc) ti’ le noj lu’umilo’, tu ya’alaje’, ti’ le ts’ook kamp’éel ja’abo’ob máaniko’oba’, jach ya’abchaj u meyajil pak’al oom, tumen jach ma’alo’ob u náajal máak yéetel: ichil jump’éel ja’abe’ je’el u yantal tak 33 mil 848 millonesil pesos.

Tu ja’abil 1930e’, pak’a’an tu k’áaxilo’ob Michoacáne’, kex 2 mil u hectáreasil oom; ti’al 1970 náak 20 mil; tu ja’abil 2000, k’uch tak 100 mil hectáreas. Beey túuno’, ti’al 2010e’ ts’o’ok u náakal 151 mil, ba’ale’ ichil ba’ax ku tukulta’al tumen Secretaría de Economía federal, walkila’ yaan kex 165 mil hectáreas.

Beyxan Luna Garcíae’ tu tsikbaltaj ichil junk’aal ja’abo’obe’, ma’ ts’a’abak mix jump’éel ts’íibil ju’un tumen Secretaría del Medio Ambiente y Recursos Naturales (Semarnat), tu’ux ka je’ets’ek je’el u páajtal u k’e’exel u beelal k’áax ti’al u pa’ak’al oom; ts’o’okole’ ti’ le ts’ook junk’aal ja’abo’obe’ sa’at junyáal xíiw yéetel che’ob kuxa’ano’ob ka’ach ti’ maanal jump’éel millónil hectáreas.

Ba’ax beetik u sa’atal k’áaxo’obe’, ku ya’alik, leti’ u seten ch’a’akal che’ob kex mina’an u páajtalil yéetel u tóokpajal k’áax. Ti’ le ts’ook ba’ala’, tukulta’ane’ u 90 por cientoile’ ku yantal tumen u yuumilo’ob k’áaxe’ ku kaxtiko’ob bix je’el u k’exiko’ob u k’a’abéetkunsa’al k’áax ti’al paak’áal.

U ya’abil k’áax k’askúunta’an tumen u pa’ak’al oome’, leti’e’ yano’ob tu chúumukil lu’um, tu’ux yaan u kaajilo’ob Uruapan, Pátzcuaro, Ario de Rosales, Ziracuaretiro, Tancítaro, Salvador Escalante, ichil uláak’o’ob.

Beyxan tu baantail purépecha lu’ume’, ti’ yaan u kaajilo’ob Zacán, Peribán yéetel Los Reyes, leti’e’ tu’ux asab ya’ab k’aasil beeta’an. Beey xan ucha’an tu lak’inil kaaj, u ya’abile’ tu kaajil Zitácuaro, yéetel Áporo beyxan Senguío kex ma’ jach ya’abaki’.

U kaajilo’ob Meseta Purépecha, Cañada de los Once Pueblos, yéetel y k’áaxilo’ob sierra de Tangancícuaro beyxan Los Reyese’, ts’o’ok u k’askúuntiko’ob maanal ti’ u 60 por cientoil ka’anal k’áax yaan ka’achij.

Ts’o’ok maanal ukp’éel décadase’, tu’ux, ti’ kaajo’ob je’el bix Tingambato, Nahuatzen, Paracho, Cherán yéetel Charapan ts’o’ok u jach k’astal lu’um tumen ku ch’a’akal che’ kex ma’ cha’abani’ yéetel ku jóok’sa’al u ayik’alil k’áax ti’al u beeta’al u meyaj k’abil yéetel nu’ukulo’ob.

U pa’ak’al oom tu lu’umil Michoacáne’, jump’éel meyaj ku beeta’al tumen 7 mil 500 u túul pak’náalo’ob; ku beetik u yantal meyaj ti’al 12 mil máak, máaxo’ob ku éensik oomo’ob yéetel uláak’ kex 2 mil ti’al máaxo’ob biinsik.

Ichil ba’ax ojéelta’an tumen Universidad Nacional Autónoma de México, ti’ u lu’umil Morelia, u 88 por cientoil máaxo’ob pak’ik oom ti’ u lu’umil Michoacáne’, ku beetiko’ob u yantal kex jump’éel k’aasil ti’al yóok’ol kaab, yaane’ ma’ jach ya’abi’ ba’ale’ yaan xane’ jach noj k’aasil ku beetiko’ob.

Tu lu’umil Méxicoe’ ku beeta’al u yóox jaatsil ti’ tuláakal oom yaan yóok’ol kaab, ba’ale’ u 80 por cientoil ti’ le je’elo’, leti’e’ ku beeta’al Michoacáno’; chéen ichil u ja’abil 2015-2018 biinsa’ab tak Estados Unidos óoli’ jump’éel millón toneladasil, beey úuchik u ya’alal tumen Asociación de Productores, Empacadores y Exportadores de Aguacate de México AC.

Ba’ale’, u ya’abkunsa’al u pa’ak’al oome’ ts’o’ok u beetik u yantal loobilaj ti’ yóok’ol kaab, beey úuchik u ya’alik Alberto Gómez Tagle Chávez, u j xak’al xookil Universidad Michoacana de San Nicolás de Hidalgo (UMSNH).

Tu ya’alaje’, ku k’askúunta’al k’áax yóok’lal le beyka’aj ja’ k’a’abéet ti’al u yúuchul paak’ale’, u k’e’exel ba’ax u beelal lu’um, u p’áatal jóojochil lu’um tumen u ch’a’akal che’. “jump’éel u hectáreail oom tu’ux pak’a’an 156 u kúulalo’obe’, ku k’a’abéetkunsik uláak’ 1.6 u téenal ja’ wa ku ke’etel yéetel le beyka’aj ku k’a’abéetkunsa’al tumen 677 xíiwo’ob ti’ jump’éel hectárea", ku ya’alik.

Talamile’ sáasil yanik: ti’al u pa’ak’áal oome’ k’a’anan u ch’a’akal u che’ilo’ob pino. Ti’al u líik’il oome’ k’a’abéet u yantal ya’ab ja’, ts’o’okole’ yóok’lal bix yanik che’e yéetel u mootse’ ma’atech u cha’ak u máan ja’ tak tu ts’u’ lu’um, le beetike’ ma’atech u suut ja’ ti’ iik’, ku ya’alik.