U chokolil yóok'ol kaabe' táan u beetik óoli' ka laj kíimik u mejenil pingüinos emperador

Ap
Boonil María León
K'iintsil

París, Francia
Viernes 26 ti' abril, 2019

Óoli’ tuláakal u mejenil pingüinos emperadores yanchajo’obe’, ts’o’ok u kíimilo’ob tumen ti’ le ts’ook óoxp’éel ja’abo’oba’ táan u jach yíibil u yotocho’ob , beey úuchik u ts’a’abal k’ajóoltbil ti’ jump’éel xak’al xook beeta’ab, tu’ux ts’íibta’abe’ jach “k’aas ba’al” le táan u yúuchula’.

U baantail Halley, ti’ p’aatal tu ja’il Mar de Weddell, Antártida, leti’e’ ka’ap’éel tu’ux ku asab yantal u jach nojoch kaajil pingüinos emperadores ichil tuláakal le yaan yóok’ol kaab, tumen ku náakal tak 25 mil u núup’ulal le ba’alche’a’ ku bin u ya’abtalo’ob ja’ab man ja’ab.

Beey túuno’, satélite oochelo’ob jóok’sa’ab tumen u británico kúuchil Antártida (BAS) tu chikbesajo’obe’, tu ja’abil 2916e’, ja’ab tu jach beetaj ooxole’, bat tu’ux ku tséentik u mejenil pingüinose’ yíibij, le beetik óoli’ láaj kíimo’ob, beey ts’a’ab k’ajóoltbil.

Ba’ax úuch te’e ja’abo’, úuch xan 2017 yéetel 2018

Le beetike’, u kaajil ba’alche’oba’ “óoli’ ts’o’ok u laj sa’atal”, ku ya’alik BAS.

“Ichil ts’ook lajun ja’abo’oba’, ts’o’ok t’u’ulpachtik u kaajil pingüinos yano’ob te’e baantaa’, beyxan uláak’o’ob yaan naats’, k k’a’abéetkunsik oochlo’ob ku jóok’sa’al yéetel satélite”, beey tu tsolaj Peter Fretwell ku meyaj BAS.

“Oochelo’obe’ ku chikbesiko’ob jach jumpuul ma’ béeyak u ya’abta’al ba’alche’ob ti’ le ts’ook óoxp’éel ja’abo’ob” tu ya’alaj.

U múuch’il máako’ob táan u beetiko’ob xak’al xooke’, tu yilaj chan ya’abchaj pingüinos yanchaj ti’ uláak’ múuch’ naats’ yanik; Dawson Lambton, ku tukultike’ u ya’abil ch’íich’o’ob yaan Halleye’ ts’o’ok u bino’ob tu’ux ma’ sajbe’entsil yanik u kuxtalo’obi’.

U j xak’al xookil BAS, Phil Trathane’, tu ya’alaje’ ma’ tu jach páajtal u je’ets’el wa yaan ba’al u yil u yíibil bat yóok’lal ambio climático. “Ba’ale’ mix juntéen yáax úuchuk ma’ tu páajtal u líik’il u mejenil ch’íich’o’ob je’el bix le táan u yúuchul walkila’”, tu ya’alaj.

U jejeláasil pingüino k’aajóolta’an beey emperadore’ leti’e’ asab nojoch yaan ichilo’obi’, ba’ale’ leti’obe’ leti’ asab séeb u yúuchul loob ti’ob tu yóok’lal cambio climático. Ti’al u ts’o’okbal sigloe’ je’el u yéemel le jaytúul yaan tak tu 70 por cientoil.