Ku jaanta'al ja'as uti'al ma' u beeta'al u makik u chi' máak

Ap
Oochel Ap
K'iintsil

Varsovia, Polonia
Miércoles 1 ti' mayo, 2019

Aj its’ato’ob yéetel u políticoilo’ob Polonia tu na’aksajo’ob ka’awjeak jejeláas oochelo’ob tu’ux táan u jaantiko’ob ja’as, lela’ jump’éel líik’saj t’aan tumen luk’sa’ab jump’éel cha’anil ti’ jump’éel noj e’esajil tu’ux ku chíikpajal táan u jaanta’al jump’éel ja’as, le jala’acho’obo’ ku tukultiko’obe’ le e’esajilo’ jach k’aas.

Le máax ku meyajo’ob ti’ Museo Nacional tu kaajil Varsovia tu ya’alajo’obe’ le cha’anil beeta’an tu ja’abil 1973 tumen ix its’at Natalia LL tu’ux ku chíikpajal juntúul x lo’bayan ko’olel táan u ki’ jaantik jump’éel ja’ase’ jach k’aas ka’aj ila’ak tumen le táankelem paalalo’obo’. Jerzy Miziolek u jo’olpóopil le kúuchilo’ t’ana’ab tumen u jala’achilo’ob Cultura ku ts’o’okole’ le e’esajilo’ anchaj u luk’sa’al te’ kúuchilo’.

Ti’ Twitter yéetel Facebook tu líik’saj u t’aan ya’ab máak tu’ux ma’atech u chíimpoltiko’ob ba’ax beeta’abij, tu’ux ku ya’aliko’obe’ lela’ jump’éel bix u maka’al u chi’ máak. Ya’ab máak tu na’aksaj oochel tu’ux táan u ki’ jaantiko’ob ja’as.