U yóolil METe' jóok' ti' 'Notas del Camp'

U chikulal ba'ax mina'an u yóol yéetel chéen k'abax ba'ale' ch'a'ab ti'al u yóol cha'an

Chance
Oochelo'ob Agencias
K'iintsil

Miércoles 8 ti' mayo, 2019
Madrid

Tu k’iinil ka’awjeak 6 ti’ mayoe’ k’iimbesa’ab, tu kúuchil Museum Metropolitan ti’ u noj kaajil Nueva York, u noj cha’anil moda: Gala Met 2019. Káaj u beeta’al tu ja’abil 1995, úuchik u patjolta’al tumen Anne Wintour, le beetike’ ma’ tu páajtal u yúuchul wa mina’an modelos, diseñadores, celebrities, wa je’el máaxak k’a’anan ichil u meyajil moda.

Taak’in ku mu’uch’ te’e cha’anila’ yaan u k’u’ubul ti’ Instituto del traje ti’ u kúuchil Museo Metropolitano de Arte yéetel ti’al e’esajil suuk u beeta’al ja’ab man ja’ab, tumen lalaj ja’abe’ yaanal ba’ax ku nooykinsa’al, leti’ túun le noj tuukul ku ch’a’abalo’ ti’al beyo’ máax ku bine’ u kaxtik u nook’ yaan ba’al u yil yéetel, ts’o’okole’ yaan xan uláak’ máako’ob ku wulabtiko’ob máak ku yéeyalo’ob tumen u editorail Vogue.

Suuka’anil u yila’al u xíimbal ti’ u chak poopil u Galail Met jejeláas búukinajo’ob ma’ suuk u yila’alobi’, ba’ale’ te’e ja’aba’ tu xáak’abtaj tuláakal u tuukulil ba’al tukulta’ab yaan u yantale’, tumen u nooyil múuch’tambale’ leti’e’ Camp, Notes on fashion.

Campe’, jump’éel ba’al ku na’atal ichil u tuukulil its’at yéetel moda, tu’ux ku wóolméek’tik u ki’ichkelemil ba’ax k’aas yéetel x pooch’il ba’al. Le ken a’alak yaan u chikpajal lo noj tuukula’ ku yila’al u woojilk noj piimta’ak ba’al, táataj xoot’o’ob, jejeláas boonilo’ob yéetel tak ba’alo’ob ku páajtal u ma’achal yéetel ku beetik u k’áatchi’ibtikubáaj máak ba’ax estilo.

Ichil máaxo’ob tu k’amaj wu’ulajo’obe’ ti’ yanchaj u ajawilo’ob Camp: Harry Styles, Serena Williams, Lady Gaga yéetel Alessandro Michele, máax beetik u jo’olbesajil patjo’ol Gucci, mola’ay ts’áak’ u taak’inil ti’al u beeta’al yéetel ku ye’esik u asab ma’alo’obil búukinajo’ob ti’ le ja’aba’.

Jak’be’en óol búukinajo’obe’ chikpajo’ob tu wíinkilal Lady Gaga wa Katy Perry. Ka’atúul x k’aayo’ob máaxo’ob tu jach t’u’ulpachtajo’ob u nooyil múuch’tambalil ti’ le ja’aba’, u modail camp, tumen ku chikbesik ba’ax ma’ suuk u yiila’ali’. U x k’aayil Shallowe’ tu búukintaj jump’éel nook’ patjo’olta’ab tumen Brandon Maxwell yéetel u xáachebil poole’ beeta’ab tumen GHD.

Beey túuno’, Katy Perrye’ tu búukintaj jump’éel ba’al tu beetaj u k’a’ajsa’al Lumière ti’ u cha’anil la Bella y la Bestia. Ts’o’okole’, ti’al u súutukil u yúuchul uk’ule’ tu jelaj u nook’ ti’al u chikpajal beey jump’éel hamburguesa. Cara Delevingne, Gisele Bündchen yéetel Priyanka Chopra tu ts’áaj u búukinajilo’ob Dior Haute Couture, beyxan yanchaj xiibo’ob Dior chikpajo’obi’: Travis Scott, Nick Jonas, Richard Madden yéetel Verbal. Choprae’ xáachebta’ab u pool tumen GHD, beyxan úuchik u beetiko’ob: Sophie Turner, Lady Gaga, Rosie Huntington Whiteley yéetel Ashley Graham.