Zuckerberge' tu líik'saj juntúul Leviatán, mina'an yéeyajil tumen máax k'a'abéetkunsik ba'al: Chris Hughes

J múul patjo’oltil Facebooke’ ku k’áatik ka xe’exet’a’ak le mola’ayo’

Afp
Boonil María León
K'iintsil

Viernes 10 ti' mayo, 2019

Chris Hughes, juntúul ti’ máax múul patjo’ol Facebooke’, tu k’áataj le miércole máanika’, ka jóok’sa’ak óox jaats ti’ yéetel tu ts’áaj u si’ipil máax jo’olbesik Facebook, Mark Zuckerberg, tumen ku ya’alike’ tu p’ataj chéen ti’ jump’éel “click” tuláakal ba’ax unaj u kaláanta’al ti’ máak le ken k’a’abéetkunsa’al le kúuchilo’.

“Ts’o’ok u k’uchul u súutukil k xe’exet’ik Facebook", k’a’anan k jatsik red social, unaj u su’utul je’el bix yanik ka’achij, beyxan unaj u beeta’al yéetel Instagram yéetel WhatsApp, beey tu ts’íibtaj Chris Hughes, juntúul ti’ máax múul patjo’ol red social, ba’ale’ ts’o’ok u chan máan k’iin u p’atej.

Ts’íibe’ jóok’sa’ab ti’ jump’éel foro ts’a’ab k’ajóoltbil tumen New York Times, ts’o’okole’ te’e ts’íibo’ chikpaj xan jump’éel oochel tu’ux ku chikpajal le ka’atúul táankelem máako’oba’, ti’ yano’ob ka’ach tu najil xook Universidad de Harvard tu ja’abil 2004, ja’ab úuchik u yáax chikpajal Facebook.

Mark Zuckerberg "ts’o’ok u líik’sik juntúul Leviatán, ku xu’ulsik empresarial óol yéetel ma’atech u cha’ak u yéeya’al ba’ax u jach k’áat máax ku k’a’abéetkunsik le kúuchilo’obo’”, beey úuchik u ya’alik Hughes, máax táakpaja’an walkila’ ti’ Proyecto de Seguridad Económica, tu’ux ku kaxta’al ka yanak kuxtal, ichil Estados Unidos, yéetel Instituto Roosevelt.

U mola’ayil Faceebok ti’ EE. UU., ts’o’ok u manik Instagram (ti’al u ye’esal oochelo’ob) yéetel WhatsApp (ti’al u séeb túuxta’al k’ubent’aan) ti’ le ts’ook ja’abo’oba’, ku much’kíinsik kex 2,7 mil millonesil máako’ob k’a’abéetkunsik tuláakal le ba’alo’oba’, le beetike’ mola’aye’ tu náajaltaj $ 2,43 mil millonesil tu yáax óoxp’éel winalo’ob ti’ le ja’aba’.

Ba’ale’ ts’o’ok u chan yantal u x wo’okinil tumen ma’ patal ba’ax tu beetaj yéetel datos privados máaxo’ob k’a’abéetkunsik le kúuchilo’obo’, le beetike’ ma’ xaan ka ts’a’abak u si’ipil tumen Agencia Federal de Regulación Comercial tu’ux ka a’alake’ yaan bo’otia’al wa bajux. Facebooke’ ts’o’ok u k’a’aytik yaan u jeel yantal ti’ tres mil millonesil dólares wa maanal ti’.

Beey túuno’, Chris Hughes ku ya’alike’, unaj u ja’atsikubáaj Instagram yéetel WhatsApp tu séeba’anil ti’ Facebook. Aplicaciono’obe’, je’el u páajtal u k’a’aytal ichil mercado de valores, tu ya’alaj.

"Ts’o’okole’, kex ka xe’exet’a’ake’, Facebook je’elili’ u páajtal u ko’onol je’el bix tak bejla’e’ tumen yaan milesil mollonesil ti’al u bo’ota’al túumben ba’alo’ob”, tu ya’alaj