Ku bin u nojochtal k'uux óol Medio Oriente, EU yaan u túuxtik ts'oono'ob

Notimex
Oochel AFP
K'iintsil

Lunes 13 ti' mayo, 2019
Washington.

Máax beetik u secretariol Defensa de Estados Unidos, Patrick Shanahan, tu jets’aj ma’alo’ob bin ka úuchuk ts’oon yéetel misiles Patriot yéetel ka k’a’abéetkunsa’ak transporte anfibio USS Arlington ti’al u meyaj tu táan Medio Oriente, tumen beey ken u núuko’ob sajbe’entsil táan u yoksa’al ti’ob tumen Irán.

Le je’ela’ je’ets’ úuchik u jóok’sa’al u múuch’il ket ba’atelil portaviones USS Abraham Lincoln yéetel xan u múuch’il bombarderos B-52, ti’al u bino’ob tu k’áak’náabil golfo Pérsico ti’al “u túuxtiko’ob jump’éel jeets’el yéetel sáasil k’uben t’aan” ti’ Irán.

"Leti’obe’ yaan u núup’ulo’ob yéetel u múuch’il USS Abraham Lincoln yéetel ti’ u tup k’áak’ilo’ob Fuerza Aérea ti’ u noj lu’umil Estados Unidos, ti’ yano’ob tu baantail Medio Oriente, tumen yéetel le je’elo’ táan u núukiko’ob ba’ax ts’o’okili’ u yáax káajsa’al tumen Irán, úuchak u ye’esik táan u yaktáantik estadunidenseil muuk’il”, beey úuchik u ya’alik Departamento de Defensa ti’ jump’éel k’a’aytajil ts’íib, úuchak u je’ets’el tumen agencia rusail Sputnik.

Estados Unidos yéetel máaxo’ob nuup’ul yéetele’ ma’ u k’áato’ob ka yanak ba’ateltáambal yéetel Iráni’, ba’ale’ ts’o’ok u “jets’iko’ob” yaan u núukiko’ob wa tumen ka k’uchuk beetbil wa ba’ax ti’ob, beey tu ya’alaj secretario de Estado, Mike Pompeo, úuchik u ya’alik Iráne’, táan u beetik u yantal k’uux óol, ts’o’okole’ tu ya’alaj “taan u yoksik sajbe’entsil” ba’ax ku beetik yéetel ba’ax ku ya’alik Teherán ti’ le ts’ook p’is k’iinilo’ob.

Ichil jump’éel péektsil jts’a’ab k’ajóoltbil tumen cadena CNN, u Administraciónil Marítima ti’ Estados Unidose’ tu k’a’aytaje’ táan u yichtik cheemo’ob yaan Irán, wa uláak’ koonolil cheemo’ob wa kúuchilo’ob tu’ux ku meyajta’al petróleo.

Le t’aana’ je’ets’ tumen táan u bin u nojochtal k’uux óolal ichil le ka’ap’éel noj lu’umo’oba’, ka’alikil Estados Unidos táan u ye’esik ma’ xaan ka péeksa’ak xaan u ts’oonil Irán, le yano’ob tu cheemilo’ob Golfo Pérsico, beey bin a’alab tumen funcionarios estadunidenseilo’ob máax u yojelo’ob jach ba’ax le táan u yúuchulo’.

Tu káajbal mayo ka nojochchaj u sajbe’entsil u beeta’al wa ba’ax k’aasil tumen Irán, yóok’ol ba’ax u k’áat óoltik Estados Unidos yéetel máax nuup’ul yéetel, ti’ xan táaka’an u kúuchilo’ob tu’ux ku meyajta’al petróleo.

5 ti’ mayo máaniko’, máax beetik u asesoril kananil ti’ u lu’umil Estados Unidose’, John Bolton, tu k’a’aytaj u túuxta’al Medio Oriente u múuch’il ba’atel portaviones USS Abraham Lincoln.