Jejeláas yóok'ol kaabilo'ob, keet u bejilo'ob

Sandra Gayou Soto
Boonil María León
K'iintsil

Mérida, Yucatán
Jueves 16 ti' mayo, 2019

Rodrigo Díaz Guzmáne' ch'éen u xíimbaltik u bejilo'ob Yucatán jayp'éel k'iino'ob. Tu ya'alaj u luk'ul ti' u kúuchil meyaj La Jornada Maya, tu ch'a'aj u nu'uklulil u ch'a'a oochel yéetel u páawoe', ka tu káajsaj jump'éel noj xíimbalil tak Jornadia.

Tu xíimbaltaj bejo'ob, tu k'ajóoltaj u máakilo'ob yéetel tu ch'a'aj oochelo'ob "tumen tajan ya'ab u yoochelil ba'ateltambal yaan ti' le lu'uma', ba'ale' weye' yaan jets'óolal, ts'o'okole' le je'elo' jump'éel ba'al ma' ojéelta'an tumen máaki'.

De La Jornada a la Jordania beey u k'aaba' u ye'esajil Díaz Guzmán yaan u ye'esa'al Alianza Francesa, yaan u káajal tu k'iinil bejla'a, oochelo'obe' tu jóok'saj úuchik u bin jump'éel winal tak Jordania yéetel úuchik u bin óoxp'éel p'is k'iinil Turquía.

Rodrigoe' tu beetaj u j ch'a'a oochelil La Jornada Maya tu chowakil óoxp'éel ja'ab yéetel uláak' táan chúumuk. Walkil óoli' wakp'éel winalo'obe', tu tukultaj k'uch u súutukil u k'exik u beelil ba'ax ku yilik, le beetik bin tak tuláak' chúumukil yóok'ol kaab.

Tu jump'éel káantináa yaan tu k'íiwikil Jo'e', La Jornada Maya tsikbalnaj yéetel yóok'lal u meyajila': "táakbesa'an 24 oochelo'ob tin jóok'saj ichil u yóoxp'éel ja'abilo'ob meyajnajen La Jornada Maya yéetel uláak'o'ob tu'ux kin we'esik ba'ax tin wilaj Oriente Medio", tu ya'alaj.

Yáax juntéen u beetik Díaz jump'éel e'esajil jach chéen tu juunal. "Ma suuka'an in beetik e'esajilo'ob", ku tiskbaltik, ba'ale' tu ya'alaje' táan u beetik tumen "its'ate' leti' a we'esik ba'ax ka beetik yéetel le je'ela' jump'éel k'iimbesaj ti'al in we'esik in meyaj".

Díaze' tu ya'alaj bix úuchik u yilik Oriente Medio “óoli' beey a yaktáantikabáaj yéetel u ch'a'a oochel ba'ale' yéetel mixba'al u nak, chéen ch'a'a oochel. Jach tin wu'uyaj beey leti' le ba'ax kin beetik ka'ach 15 in ja'abil, tumen mina'an wa ba'ax táan in kaxtik, chéen in ch'a'ak oochelo'ob tumen uts tin wich".

Oochelo'ob tu jóok'saj Oriente Medioe' ti' tu ch'a'aj tu noj kaajilo'ob Ammán yéetel Wadi Musa, tu noj lu'umil Jordania, yéetel Estambul, Turquía.

“Jump'éel ba'al jach k'a'anane', leti'e' ts'íib táan u beeta'al tu yóok'lal in meyaj tumen Pepe Elorza (compositor), táan u k'a'anankúunsik u k'aaba' oochelo'ob tumen yaan k'ine' mina'an”, tu ya'alaj.

Ken ts'o'ok e'esajile' Rodrigoe' yaan u bin kajtal Ciudad de México, tu'ux yaan u p'isbaltik u jóok'sik oochelo'ob. Tak walkila' ma' u yojel wa láayli' yaan u kaxtik meyaj ti' jump'éel kúuchil k'a'aytik péektsilo'obi' ba'ale' u yojel u jóok'sik oochelo'obe' yaan, "lelo' leti' ken in beetej. Wa ma'e' ti' yaan xan guitarra”, báaxal t'aanajij.