Táanxel máako'obe' ku náajalo'ob yéetel kmeyaj: x-otomí chuuy

Ts'íib yéetel oochel AFP
K'iintsil

Lunes 24 ti' junio, 2019
Tenango de Doria, Hidalgo.

U kajnáalilo’ob Hidalgoe’ tu ya’alajo’ob le ba’ax bin tso’ol tumen u mola’ayil Carolina Herrera ma’atech u sáasilkunsik mixtech u k’exik mixba’al tumen leti’obe’ láayli’ táan u yilko’ob bix u ayik’alkúunsikuba’ob yéetel u miatsil u ch’i’ibal, ts’o’okole’ ti’ leti’obe’ mixba’al ku ts’a’abal.

Glafira Candelaria, juntúul u máasewalil Méxicoe’, 59 u ja’abil, ku k’éexel u yóol le ken t’aanak yóok’lal u túumben colecciónil jóok’sa’an tumen u moala’yil modas Carolina Herrera, tu’ux k’a’abéetkunsa’an u chíikulal u kaajal.

Máax beetik director creativo ti’ Carolina Herrera, Wes Gordon, tu k’a’abéetkunsaj ch’íicho’ob yéetel t’eelo’ob bak’pachta’an tumen che’ob yéetel xíiwo’ob, le suuk u beeta’al tumen xchuuyilo’on Tenango, yéetel ulaak’ diseños suuk u beeta’al ti’ uláak’ ka’ap’éel máasewal kajo’ob ti’al u jóok’sik u colecciónil Resort 2020, le beetik yanchaj u t’aanil tumen u jala’achil México, máax tu k’áataj ti’ Carolina Herrera -mola’ay síij tu kaajil Nueva York tu ja’abil 1980, tumen xvenezolana diseñadorail láayli’ beey u k’aaba’- ka u tsol ba’axten tu ch’a’aj máasewal chíikulalo’ob ti’al u jóok’sik u meyajil.

Nook’ jóok’sa’abe’ ku chíimpoltik u ki’ichkelemil yéetel u noj ba’alil mexikana miatsil, le beetik xan ku noj ba’alkunsik chuuy ku beeta’al ti’ le lu’uma’, beey úuchik u ya’alik estadunidenseil Gordon, máax tu káajsaj u meyaj beey creativo jump’éel ja’ab paachil.

Beey túuno’, Glafira yéetel u yéet kajnáalo’obe’ ma’atech u éejentiko’ob ba’ax ku ya’aliko’ob. “Táanxel wíiniko’obe’ chéen ku taalo’ob ti’al u ayik’alkúunsikubáajo’ob yéetel kmeyaj, yéetel ba’ax táan kbeetik tumen leti’obe’ ko’oj u koniko’ob. Ku páajtal u ta’akal u poolo’ob wa u k’áatiko’ob ka sa’atbesa’ak u si’ipilo’ob”, ku ya’alik Glafira, ka’alikil u cha’antik u yoochel u nook’ilo’ob colección Resort 2020, milsesil dólares u ko’onol.

Carta Internacional de Derechos Humanosku chíimpoltik u noj ba’alil u na’at wíinik beey jump’éel noj páajtalil ku yantal ti’ máak, ts’o’okole’ Ley Federal del Derecho de Autor ti’ u lu’umil Méxicoe’ ku jets’ike’, unaj u chíimpolta’al tuláakal meyajo’ob ku beeta’al yéetel ku na’atal beey popular miatsil. Beyxan ku jets’ike’ unaj u ts’íitpajal yéetel u sáasilkunsa’al ti’ kaaj ti’alintik chíikulale’ ba’ax bíin beeta’ak yéetel, wa tumen yaan u k’a’abéetkunsa’al ti’al u beeta’al nu’ukulo’ob.

Yóok’lal le je’elo’, u mola’ayil Carolina Herrera ma’ xaan ka ts’a’abak u tak poolil tumen ma’ tu ts’áaj u k’aaba’ kaaj tu’ux tu ch’a’aj chíikulal ti’al u beetik nook’, ba’ale’ leti’ u jala’achil México unaj u beetik tuláakal ba’al ti’al u jet’sik u muuk’ si’ipil.

U k’a’abéetkunsa’al u chíikulal máasewal kaajo’obe’, ma’ jump’éel tumben ba’ali’. Mola’ayo’ob je’el bix Zara, Mango, Isabel Marant yéetel Rapsodiae’ ts’o’ok xan u ch’a’ako’ob máasewal chíikulalo’ob beeta’an tumen u máasewal kaajilo’ob México.