Ku ch'a'ajolta'al u chu'ukul ballena ti'al konbil, tu lu'umil Japón

AFP
Oochel Agencias
K'iintsil

Kushiro, Japón
Martes 2 ti' julio, 2019

Lunes máanika’, japonesil cheemo’obe’ tu chukajo’ob, yéetel jump’éel loomil nu’ukule’, ka’atúul ballenas ichil niponail k’áak’náabil, ti’al beyo’ u ye’esal ts’o’ok ch’a’ajolta’al u chu’ukul le ba’alche’a’ ti’al u ko’onol, xoot’ u beeta’al kex óoxp’éel décadas.

U ch’a’ajolta’al u chu’ukul tuka’atéen cetáceob ti’al konbile’ páatchaj u beeta’al úuchik u je’ets’el tumen jala’achobe’ yaan u p’áatal paachil Comisión Ballenera Internacional (CBI) walkil wakp’éel winalo’ob paachil, le beetik mina’an si’ipil wa ku beeta’al.

Ka’atúul ballenas ti’ u jejeláasil Minke jchu’uko’ob tumen cheemo’ob jóok’o’ob ja’atskab k’iin ti’ u k’áak’náabil Kushiro (septentrional petenil Hokkaido), tu’ux yáax beeta’ab jump’éel kili’ich t’aan, tumen máako’ob yéeyabo’ob, ti’al u jaakunsiko’ob jump’éel ba’al suuk u beeta’al ka’achij.

Kex jump’éel ti’ le cheemo’ob jóok’o’ob te’e súutuko’, suunaj tu taal u chíinil k’iin ti’al u yéensik jumtúul ti’ le ba’aleche’ tu chukajo’ob, beey a’alabik tumen u periodistailo’ob AFP.

“Bejla’a u tajan ma’alo’obil k’iin. Páatchaj kchukik juntúul nojoch ballena. Jach ki’ ken kjaantej. Kex ba’al ti’ yanchaj kpáa’tik 31 ja’abo’ob”, tu ki’imak óoltaj Yoshifumi Kai, máax jo’olbesik jump’éel u múuch’kabil chuk ballena, ka’alikil u cha’antik cetáceo tu chukajo’ob, 8.3 metros ku p’isik u chowakil.

“Ma’ nojoch kmola’ayili’, ba’ale’ ki’imak in wóol in chukik ballenas. Jump’éel ba’al suuk u beeta’al walkil 400 ja’abo’ob tin kaajal”, tu tsolaj, ka’alikil u chikpajal u ki’imak óolil tumen táan u ka’a máan ich ja’.

Jela’an book ku jóok’ol tu chi’ ballena jaapal, ts’o’okole’ u nak’e’ xíik ich k’áak’náab ti’al u tuul u k’i’ik’eli’. Ballenae’ isíinsa’ab yéetel ja’, ts’o’okole’ chuk kayo’obe’ tu wekajo’ob sake tu yóok’ol, tumen beey u chikbesiko’ob ki’imak u yóolo’ob yéetel táan u kili’ichkúunsiko’ob.

Periodista’ob cha’aban u máano’ob ti’al u cha’antiko’ob bix u k’ujsa’al le ba’alche’a’, jma’ach 42 kilómetros náachil ti’ u jáal ja’il Kushiro, yanchaj u luk’sa’alo’ob ma’ili’ káajak u meyajil desguace.