U yáalkabansajil San Fermíne' ku p'atik óoxtúul máak loobilta'an; juntúule' talam yanik

AFP
Oochel Reuters
K'iintsil

Martes 9 ti' julio, 2019
Madrid, España

Ka’atúul estadunidenseilo’ob yéetel juntúul españolile’ k’óochabo’ob, ts’o’okole’ yanchaj uláak’ óoxtúul máak úuch loob ti’ob úuchik u yúuchul u yáax k’aalil, ti’ le domingo máanika’, ichil u cha’anil San Fermín tu noj kaajil Pamplona (Navarra, tu xamanil España), beey úuchik u ts’a’abal k’ajóoltbil tumen jo’olpóopilo’ob le kaajo’.

Ichil le máaxo’ob úuch loob ti’ ka’alikil táan u paklan yáalkabansa’al yéetel wakaxo’ob tu bejilo’ob Pamplonae’, ti’ yaan juntúul estadunidenseil 46 ja’abo’ob, ku ya’alale’ talam yanik u toj óolal úuchik u k’óocha’al tu kaal, beey je’ets’ik tumen u ts’akyajilo’ob jala’ach ti’ u baantail Navarra.

Uláak’ juntúul estadunidenseil, máax 23 u ja’abile’, k’óocha’ab tu píix ba’ale’ ma’ jach talam yaniki’, je’el bix xan uláak’ juntúul españolil yaan 40 u ja’abil, máax ch’a’apachta’ab tumen juntúul wakax tu píix xan.

Beey túuno’, uláak’ óoxtúul españolilo’ob, juntúule’ 18 u ja’abil, uláak’e’ 23 yéetel u ts’ooke’ 38e’ jejeláas bin úuchik u yúuchul loob ti’ob, a’alab tumen jo’olpóopo’ob.

Cruz Roja xane’ ts’o’okili’ u ya’alik sajbe’entsil ka úuchuk le k’aalila’ tumen ya’ab máak ila’ab u k’uchuli’.

Wakaxo’obe’ maanal ti’ ka’ap’éel minutos úuchik u xáantalo’ob

U k’a’alal máak yéetel u wakaxilo’ob Puerto de San Lorenzoe’ óoli’ séeba’an úuchik u beeta’al, xáanchajo’ob ka’ap’éel minuto yéetel uláak’ 41 segundos ka’alikil u laj áalkabtiko’ob 848 metros ti’ u kóoch bejilo’ob Pamplona.

U cha’anilo’ob San Fermíne’, suuk u beeta’al 6 tak 14 ti’ julio, jump’éel ti’ le asab k’ajóolta’an España yéetel ja’ab man ja’abe’ suuk u kóojol ya’abach xíinximbal máako’ob ti’ jejeláas lu’umilo’ob yóok’ol kaab.

Ichil jump’éel p’is k’iine’, lalaj ja’atskab k’iin ken u chuk las 8e’, ku káajal u yáalkabil máako’ob u búukintmaj u sak nook’o’ob yéetel u sak chowak pantalón, beyxan u k’axmajo’ob jump’éel chak nook’ tu kaalo’ob; ken ts’o’okok túun u k’ubentikubáajo’ob ti’ San Fermíne’ ku máan yáalkabo’ob táanil ti’ wakaxo’ob cha’abano’ob tu k’íiwikil Pamplona.

Je’el máaxak maanal 18 u ja’abile’ je’el u páajtal u táakpajal ti’ le áalkabila’, ba’ale’ jo’olpóopo’obe’ mantats’ u k’a’aytiko’ob u sajbe’entsil u beeta’al, tumen te’e cha’ana’ ts’o’ok u yantal 16 u túul máak kimen lik’ul u ja’abil 1911, u ts’ooke’ úuch tu ja’abil 2009.

Ti’ cha’an beeta’ab tu ja’abil 2018e’, yanchaj 42 u túul sanfermino’ob úuch loob ti’ob, tu’ux yanchaj uláak’ ka’atúul máak k’óocha’ab.