¡Ma'alobech, Ñero!

Kíim Armando Ramírez, máax tu ts'áaj u t'aan u múuch'kaajil Tepito

La Jornada Maya
Oochel @armandor.ramirezrodriguez7
K'iintsil

Jueves 11 ti' julio, 2019
Ciudad de México

Jo’oljeak miércolese' kíim jts'íib Armando Ramírez, máax yaan ka'ach 65 u ja'abil, beey úuchik u ts'a'abal k'ajóoltbil ti' jump’éel k'a'aytajilts'íib ti' redes sociales, tumen u láak'tsilo'ob.

Leti'e' juntúul jts'íib péektsil yéetel conductor ti' u nu'ubesajilo'ob cha'an, Armando Ramíreze' k'ajóolta'ab yóok'lal u meyajil beey cronista ti' U Noj Kaajil México. Leti' u yuumil u ts'íibil Chin chin el teporocho, meyaj beeta'ab u cha'anil tu ja'abil 1975 yéetel u jo'olbesajil meyaj Gabriel Reyes, yéetele' náajalta'ab jump’éel Ariel, ts'o'okole' yanchaj uláak’o'ob je'el bix Noche de Califas, Quinceañera. Me llaman la Chata Aguayo, Sóstenes San Jasmeo. El presidente entoloachado, La chachalaca, el pelele y el legítimo yéetel la tipeteada, ichil uláak’o’ob.

Te’e K’a’aytajilts’íibo', ts'íibta'an u k'aaba' u yaalo'ob Marcela, Jimena yéetel Armando, ku ya'alik beya': Bejla'e' u baatsil Ramíreze' ku ts'áak k'ajóoltbile'… kyuume' táant u kíimile'… kk'áat kk'a'ajs je'el bix ka'acho'… juntúul máak u yaabiltmaj kuxtal, u kaajal yéetel u múuch'kajtalilo'ob… ba'ale' beey kyuum máax jach chingón, jyaabilaj, jna'at ba'al yéetel líik'saj óol ti'al a beetik ba'ax a k'áat yéetel a kuxtal… leti'e' ts’o’ok u bin ba'ale' mantats' bak'pachta'an tumen u paalal… Ma' tbin a'al bix úuchik u kíimil, yaan k-a'alik u muuk'il yanchaj ti' u kuxtal… ka'akáat k-a'alik tu'ux bíin mu'ukuk".