Yáax juntéen, lik'ul 1965, ku je'ebel u joolnajil ka'ap'éel úuchben p'íichtuunich naj Egipto

Ap
Oochel AFP
K'iintsil

El Cairo, Egipto
Martes 16 ti' julio, 2019

Egiptoe’ tu je’ek’abtaj u joolnajil ka’ap’éel u noj úuchben p’íichtuunich naj asab úuchbentak ti’al ka páata’ak u k’ajóolta’al tumen ajxíiximbal máako’ob, le kúuchilo’oba’ ti’ p’aatal 40 kilómetros náach ti’ u noj kaajil, El Cairo. Yáax juntéen u beeta’al lik’ul u ja’abil 1965.

Máax beetik u ministroil Antigüedades, Khaled el-Anany, tu ya’alaj ti’ kúuchilo’ob k’a’aytik péektsilo’obe’, ajxíinximbal máako’obe’ yaan u páajtal u cha’antiko’ob u p’íichtuunich najil Acodada yéetel uláak’ jump’éel yaan tu tséel, le je’elo’oba’ ti’ yano’ob ichil u yúuchben kaajil Dahshur, táaka’an ichil necrópolis Menfis, kúuchil ts’o’ok u je’ets’el tumen Organización de Naciones Unidas para la Educación, la Ciencia y la Cultura beey patrimonio cultural de la humanidad.

U p’íichtuunich najil Acodada, líik’sa’ab tu k’iinil táan u beetik u jala’achil faraón Snefrú, ichil u ja’abil 2600 aC, noj ba’al tumen chéen ti’ leti’ yaan ka’ap’éel najo’ob ichil.

El-Anany tu ya’alaje’ u p’íichtuunich najil Acodadae’ ku chikbesik bix úuchik u máan k’eexil kuxtal tak bix úuchik u beeta’al u p’íichtuunich najil Escalonada de Zoser (2667-2648 aC) yéetel Meidum (naats’ ti’ u ja’abil 2600 aC).

Funcionario egipcioile’ tu k’a’aytaj xan yaan egipcioil arqueólogo’obe’ ts’o’ok u kaxtiko’ob láayli’ ichil u k’áaxil úuchben kaaje’ junmúuch’ sarcófagos beeta’an yéetel tuunich, luuk’ yéetel che’, yaane’ tak u momial yaan.

Arqueólogo’obe’ tu kaxtajo’ob xan k’oojo’ob beeta’an yéetel che’, k’a’abéetkunsa’ab ti’al u mu’ukul máak yéetel kaxta’ab xan nu’ukulo’ob ti’al u xo’otol tuunich, u yúuchbenile’0 ti’ yaan ichil periodo tardío (664-332 aC), tu ya’alaj.

Mostafa Waziri, máax beetik u secretario generalil Consejo Supremo de Antigüedades, tu ya’alaje’ kaxta’ab nukuch tuunicho’ob tu’ux yaan u xéexet’aj sajkab yéetel granito, tu ya’alaje’ yaan úuchben muukulil máako’ob te’e baantao’.