Kíim Jorge Acevedo Mendoza, jch'a'a oochel aja'an u yóol

Sa'at u kuxtal jts'íib k'ajla'ayil oochel yóok'lal u líik'saj t'aanil ajmeyajo'ob tu lu'umil México

La Jornada Maya
Oochel Jorge Acevedo Mendoza / Cuartoscuro
K'iintsil

Lunes 22 ti' julio, 2019

Jorge Acevedo Mendoza síij tu noj kaajil Distrito Federal, bejla’a CDMX, tu ja’abil 1949. Jach k’ajóolta’a yóok’lal u meyail jch’a’a oochel ti’al u k’a’aytal péektislo’ob tu chowakil óoli’ jo’op’’éel décadas. Tu beetaj jejeláas e’esajilo’ob ti’al u ts’áak’ k’ajóoltbil u meyaj. Beyxan tu yoksubáaj ti’ política sindical, úuchak u beetik u secretarioil general ti’ u múuch’kabil INAH. Ti’al u ts’o’okbal u ja’abilo’ob ochentae’ bin kajtal Oaxaca, tu’ux kíim tu yáak’abil sábado máaniko’. Jorge Acevedoe’ ku meyajtaj ba’ax k’ajóolta’an beey técnica análoga, yéetele’ tu jóok’saj u yoochel úuchik u tíita’al lu’um tu ja’abil 1985 ti’ u noj kaajil México. Juntúul ti’ máaxo’ob káajs u meyajil La Jornada yéetel yanchaj meyaj u jóok’s ti’ jejeláas áanalte’ob. Múul meyajnaj yéetel pik’il ju’uno’ob je’el bix México en la Cultura de Siempre, Ojarasca yéetel Camino Blanco, ichil uláak’o’ob. Tu yóok’lale’, Luis Hernández Navarro, tu ts’íibtaj ti’ Twitter, Acevedoe’ juntúul máak tu ts’íibtaj u k’ajla’ayil líik’saj t’aanil beeta’ab tumen aj meyajo’ob tu ja’abilo’ob 70, ba’ale’ letie’ tu ye’esaj yéetel oochelo’ob. Ka utsuk k’a’amikech tumen lu’um, láak’.