Iker Alonso Hernándeze', bolonp'éel u ja'abil, béeychaj u beetik 70 na'at xookil ichil jo'op'éel minutos

Mexikanoile’ tu náajaltaj yáax kúuchil ti’ u keetil Campeonato Internacional de Cálculo Mental 2019, tu lu’umil China

Javier Salinas Cesáreo
Oochel
K’iintsil

Coacalco, México
Miércoles 24 ti’ julio, 2019

Iker Alonso Hernández, juntúul chan paal sijnáal Coacalco, tu náajaltaj u k’aaba’il Grand Champion ichil u keetil Campeonato Internacional de Cálculo Mental 2019 Aloha Arithmetic Mental, beeta’ab tu noj lu’umil China.

Bolonp’éel u ja’abil walkila’, juntúul paal jach na’atuna’at. Tu beetaj 70 u p’éel cálculos ts’o’okole’ laj tu beel jóok’ik ti’, mixaba’al k’aschaj ti’, chéen jo’op’éel minutos tu biinsaj ti’, le beetike’ máan táanil ichil u jaatsil Kids, tu’ux ku táakpajal paalal yaan waxak wa bolonp’éel u ja’abil.

Te’ súutuko’ tu ketajubáaj 700 u túul xoknáalo’ob ti’ jejeláas lu’umo’ob, je’el bix Indonesia, Uzbekistán, México, India, Rusia, Camboya, Portugal, Bangladesh, Panamá, España, China, Irlanda, Croacia, Malasia, Ecuador yéetel Filipinas.

“Tuláakal máax táakpaje’ tu beetaj cálculos yéetel u yáantajil ábaco japones ichil u tuukul; wa tumen ku babal k’a’abéetkunsa’al nu’ukule’ ku kanik máak u meyajtej, le beetik ma’ k’a’abéet u jach machmajo’ob le ken jo’op’ok u beetiko’ob, chéen tu tuukul yaan. Grand Champion, leti’e’ le k’aaba’ tu náajaltaj Iker Alonso Hernández, ts’o’okole’ leti’e’ asab k’a’anan chíimpolal yaan ichil le keetilo’”, beey úuchik u k’a’aytal tumen u jala’achil kaaj.

Alonso Hernández, juntúul xoknáal ya’atak u káajsik quinto grado ti’ u xookil primaria, te’e tu naajil xook Independencia, ti’ u kaajil Coacalco, yanchaj u kaxtik yéetel u na’ bix ken xi’ik tak tu’ux ku beeta’al le keetilo’. U na’ Karina Hernández Campuzano, tu béeykunsaj úuchik u máan koonol ch’ujuk yéetel u beetik rifas; ts’o’okole’, tu k’amajo’ob u yáantajil u ayuntamientoil le kaajo’.

U jach ma’alo’ob u na’at paal ti’ matemáticase’ j-ila’ab tumen u jka’ansajo’ob yéetel u na’ ka tu chukaj kamp’éel u ja’abil.

Meyaj yéetel u yóol u beetik ba’ale’, ts’o’ok u chikbesik Iker Alonso Hernándeze’ no’ojan ti’al u beetik cálculos tu beel. Le beetike’, ts’o’okili’ u yáax náajaltaj u yáax kúuchil u jaatsil Kids, tu waktéen keetil beeta’ab Querétaro, tu winalil marzo máanik, tu’ux béeychaj u náajaltik u bin ti’ keetil yaan u beeta’al yéetel táatanxel lu’umilo’ob, tu lu’umil China.