Yáax kúuchil ti'al México ti' Panamericanos

Beyxan Ana Ibañez yéetel Leonardo Juárez loots’najo’ob ti’ u jaatsil poomsae ti’ taekwondo

La Jornada Maya
Oochelo'ob
K'iintsil

Lima, Perú
Lunes 29 ti' julio, 2019

Te’e k’iino’oba’ táan u beetchajal u keetil Juegos Panamericanos Lima 2019, tu’ux muuch’ul u asab ma’alo’ob máako’ob ku beetiko’ob jejeláas deportes, ti’al beyo’ u jéets’el máax asab ma’alo’obil ti’ le ba’ax u yojel u beeto’ob.

Beey túuno’, yaan mexikanoilo’ob ts’o’ok u ketikubáajo’ob, je’el bix Daniela Campuzano tu k’ubaj ti’ México jump’éel u medallail oro ichil u jaatsil ciclismo de montaña, úuchik u máan táanil ti’ x-áargentinail Sofía Gómez yéetel x bráasileña Jacqueline Mourao.

Campuzanoe’ ts’o’ok u yáax ketikubáaj ka’ach ti’ u ja’abil 2015, láayli’ ti’ Juegos Panamericanos de Toronto-2015 ba’ale’ ti’ jts’o’ok ti’ kankúuchil, ka’alikil ti’al 2011, ti’ keetil yanchaj Guadalajarae’ ti’ jp’áat tu bolonkúuchil. Te’e ja’aba’ tu yáalkabtaj 4.2 kilómetros ti’ u limeñoil wóolisbeel Morro del Solar, ba’ale’ ti’al u beetike’ yanchaj u bak’pachtik kantéen ts’o’okole’ mixjuntéen p’áat paachil ti’ u yáax kúuchil primer loop, ka’alikil Gómeze’ tu ts’o’oksaj tuláakal ichil 1h31:06 yéetel Mpuraoe’ xáanchaj 1h31m12s.

Beyxan láayli’ ti’ u keetil ciclismo de montaña ba’ale’ ti’ xiibo’obe’ mexikanoil Gerardo Ulloa Arévalo, tu kanaj máan táanil óoli’ ti’ u jach káajbal le keetilo’, tumen uktéen úuchik u yáalka’abtik 4.2 kilómetros, kex ti’ u súutukil ku yantal u na’akale’ óol talamchaje’, ba’ale’ tu jach ts’áaj u yóol ti’al beyo’ u ts’áak uláak’ jump’éel oro ti’ México.
U ka’a kúuchile’ jp’áat ti’ brasileñoil Henrique Da Silva, máax tu ts’o’oksaj u yáalkabtik tuláakal ichil 1:27:08 horas, yéetel broncee’ jp’áat tu k’ab jchilenoil Martín Vidaurre, máax xáanchaj 1:27:31.

Ka’alikile’ mexicano’ob Ana Ibañez yéetel Leonardo Juáreze’ loots’najo’ob ti’al u náajaltiko’ob u yáax kúuchil ti’ u jaatsil pareja mixta ichil u keetil poomsae ti’ taekwondo, úuchik u náakalo’ob tak 7.440 puntos. Beey úuchik u p’áatiko’ob paachil ka’atúul canadienseilo’ob, ka’alikil broncee’ náajalta’an tumen estadunideseilo’ob.