A'almajt'aane' ma'atech u kaláantik u yits'atil nu'ukul máasewal kaajo'ob

Sputnik
Oochel Carolina Herrera
K'iintsil

Miércoles 31 ti' julio, 2019

Tu noj lu’umil Méxicoe’ mina’an a’almaj t’aan jeets’el tu’ux ka kaláanta’ak ba’ax ku jóok’ol, yantal wa beeta’al tumen máasewal kaajo’ob, mixba’al kaláantik ba’ax u yojel u beet kaajo’ob, le beetik ku yúuchul ba’al je’el bix yéetel diseñadoro’ob ku taalo’ob ti’ táanxel lu’umo’ob, beey tu ya’alaj Ignacio Otero, juntúul jka’anal xook yóok’lal u kaláanta’al u yuumil ba’al wa derechos de autor.

“Ichil u a’almajt’aanil Ley Federal de Derechos de Autor mix tu’ux ku ch’a’achibta’al wa ba’ax yóok’lal u yuumil ba’ax ojéela’an tumen máasewal kaajo’ob tumen yaan u nu’ukulilo’ob tu’ux ku jéets’el u miatsilo’ob, ts’o’okole’ ma’ xan táan u beeta’al u yúuchul bo’ol tu yóok’lalo’ob, chéen ku ya’alike’ ma’atáan u cha’abal u jelbesa’al wa u p’íttkúunsa’al”, tu ya’alaj Otero, juntúul ka’anal xook ti’ Facultad de Derecho ti’ u najil xook Universidad Nacional Autónoma de México (UNAM) yéetel ts’o’ok xan u máan wa jaytéen u jo’olbes Registro Público del Derecho de Autor.

A’almaj t’aane’ jóojochil yanik tu yóok’lal le je’ela’, ba’ale’ yanchaj u xwo’okinil tu’ux ch’a’achibta’aj Congreso úuchik u ts’a’abal k’ajóotlbil u ts’ook colecciónilo’ob táanxel máako’ob meyajtik moda, je’el bix Carolina Herrera yéetel Louis Vuitton, máaxo’ob k’a’abéetkunsik u yoochel u woojil máasewal kaajo’ob ti’ u lu’umil México.

Jach nojoch talamil yaan ti’ a’almajt’aan

Ignacio Otero, juntúul ti’ u yuumil u áanalte’il Propiedad intelectual: simetrías y asimetrías, entre el derecho de autor y la propiedad industrial, tu múul ts’íibtaj yéetel Miguel Ángel Ortiz, ku tukultike’ “jump’éel jach nojoch talamil yaan ti’ a’almaj t’aan ma’atech u cha’ik u kaláanta’al u yits’atil kaaj”.

Talamile’ ti’ ku káajal tu jaatsil 157 ti’ le a’almaj t’aano’, tumen ku ya’alik: ‘‘manifestaciones primigenias en sus propias lenguas, y los usos, costumbres y tradiciones de la composición pluricultural que conforman al Estado mexicano, que no cuenten con autor identificable’’.

Beey túuno’, ku asab k’astal ba’al ti’ u jaatsil 158 tu’ux ku t’aan yóok’lal u yuumil patrio chíikulal yéetel u ba’ax yaan u yil yéetel je’el ba’axak ka u chikbes miatsil. Ku xo’okol: ‘las obras desarrolladas y perpetuadas en una comunidad o etnia originaria’’ chéen ku kaláanta’al wa tumen ka k’uchuk jelbesbil, ‘‘contra su deformación, hecha con objeto de causar demérito a la misma o perjuicio a la reputación o imagen de la comunidad o etnia a la cualpertenecen’’.

Talamil túune’ ku tajan k’astal tu jaatsil 159, tumen ku ts’áak páajtalilo’ob: ‘‘la utilización de las obras literarias, artísticas, de arte popular o artesanal; protegidas por el presente capítulo, siempre que no se contravengan las disposiciones del mismo’’.

Jxak’al xooke’ ku ya’alike’ diseñadoro’ob yéetel uláak’ máako’ob patjo’oltik ba’alo’obe’ je’el u páajtal u ya’aliko’obe’ chéen táan u ch’a’ak u yóol ba’ax patjo’olan tumen máasewal kaajo’ob tumen ma’atáan u “k’askúunta’ali’” mix táan u “jelbesa’al u yoochel”, kúulpach ba’al ku beeta’al.

Leti’e’ ku tukultik a’almajt’aane’ unaj u k’e’exel ti’al ka “yanak u k’áata’al u páajtalil u k’a’abéetkunsa’al ti’ u yuumilo’ob yéetel kaajo’ob, máaxo’ob unaj xan u ye’esiko’ob táan xan wa ku cha’ako’ob wa ma’ u meyaj ti’ yaanal máak, tumen k’a’abéet u beeta’al ichil múuch’tambal tu’ux ka táakpajak u ya’abil máak”.

U k’ajla’ayil u kaláanta’al u yuumil wa ba’ax

Xwo’okinile’ yáan u chikpajal tak ti’ táanxel lu’umo’ob, le beetike’ México yéetel uláak’ noj lu’umo’obe’, unaj u tukultiko’ob Convenio de Berna, je’ets’ tu ja’abil 1856, ku kaláantik u meyajil káan iik’ ti’ilil, paax, cha’an, óok’ot, ichil uláak’ u jaatsil its’at, ichil tuláakal yóok’ol kaab.

Mokt’aane’, tu’ux táakpaj México ichil u ja’abilo’ob 60 ti’ le siglo máaniko’, káaj chéen yéetel lajunp’éel noj lu’umo’ob, ba’ale’ walkila’ ts’o’ok u náakal 188, ku ya’alik Otero.

A’almajt’aane’ je’ets’ tumen ichil u sigloil XIX, tu lu’umil Francia, “tu’ux ma’ ki’imak u yóol kaaj yóok’lal bix táan u jóok’sa’al jump’éel xookil ti’ pik’il ju’uno’ob, tumen ku k’i’itbesa’alo’obe’ ts’o’okole’ ti’ u yuumilo’obe’ ma’atech u bo’ota’al”, ku tsikbaltik.

Yanchaj u chowak xíimbalil ti’al ka páatak u je’ets’el Convenio de Berna tu’ux ku kaláanta’al u yuumil wa ba’ax ku patjo’oltal.

‘‘Chéen México yéetel Rusia ts’o’ok u k’áatiko’ob, ichil siglo máaniko’, ti’al ka yanak uláak’ jump’éel u jaatsil tu’ux ka kaláanta’ak u yits’atil kaajo’ob yéetel ba’ax u yojelo’ob”, ku ya’alik jxak’al xook.