Peten Henderson, sujuy k'áax ka'achij ba'ale' bejla'e' tu báab ich plásticos

Ts'íib yéetel oochel AFP
K'iintsil

Wellington, Nueva Zelanda
Jueves 1º ti' agosto, 2019

Tu ja’abil 1988e’ u petenil Henderson, ti’ p’aatal Pacíficoe’, táakbesa’ab ichil u tsolts’íibil kúuchilo’ob jeets’el beey patrimonio mundial, tumen óoli’ sujuy yanik u k’áaxil. Ba’ale’, wakila’ táan u ku’upul u yiik’ tumen táan u kóojol plásticos, tu k’áak’nabil u k’uchul, ts’o’okole’ jxak’al xooko’obe’ ma’ u yojelo’ob bix je’el u ch’éensiko’obe’.

Petene’, táaka’an ichil u lu’umil Pitcairn, chúumuk bej p’aatal ichil Nueva Zelanda yéetel Perú, noj lu’umo’ob náachchaja’ano’ob yóok’lal 5 mil 500 kilómetros.

Kex tumen jach jatsa’ano’obe’, ts’o’ok u yila’al te’e peteno’ jach ya’ab plásticos muuch’uli’, ti’ jejeláas tu’ux u taal, ts’o’okole’ ku k’uchul tumen ku biinsa’al tumen u muuk’il u yáalkab k’áak’náab.

“Ts’o’ok k-ilike’ jejeláas tu’ux u taal plásticos”, beey tu ya’alaj Jennifer Lavers, juntúul x-australianail xak’al xook tu beetaj jump’éel xaak’al te’e peteno’.

“Yaan ka’ach botellas, laatas, u nu’ukul chukkay yéetel u yalabil jejeláas ba’alo’ob ku ko’onol ti’ je’el ba’axak lu’umil a k’áatej, Alemania, Canadá, Estados Unidos, Chile, Argentina, Ecuador”, tu ya’alaj.

“U jaajile’ jump’éel páayt’aan, tumen táan u chikbesike’ lalaj lu’umo’obe’ yaan u kuuch ti’al u kaláanta’al yóok’ol kaab, kex tumen jach náach yanik lu’um”, tu tsikbaltaj.

U petenil Hendersone’ ti’ p’aatal tu subtropical chúumukil Pacífico Sur, jump’éel u nojoch mosonil k’áak’náab kúulpach u suut ti’ bix u suut u púuts’il reloj, ts’o’okole’ ti’ ku yéemel tak tu jáal ja’il Australia ti’al u na’akal tu baantail Sudamérica.

Beey túuno’, moson ja’e’ ku náakal tak tu’ux yaan atolón (coralina peten ich k’áak’náab) tu’ux ku yáantaj ti’al u yantal jejeláas kuxtal ich ja’ yéetel ch’íich’.

Noj ba’al ti’al yóok’ol kaab

Kex tumen ma’ ya’ab ba’alche’ob yaan ti’ atolono’obe’, tu petenil Hendersone’ yaan jejeláas kuxtali’, le beetik táakbesa’ab ichil u tsolts’íibil patrimonio mundial ku beeta’al tumen Unesco tumen noj ba’al ti’al yóok’ol kaab.

Tu kúuchil Internete’ Unescoe’ ku ya’alik: En su calidad de una de las últimas islas calcáreas de gran tamaño en haber conservado una ecología prácticamente intacta, la Isla Henderson ha preservado su belleza excepcional con sus playas de arena blanca, sus acantilados calcáreos y su rica vegetación.

Ts’o’ok u máan jayp’éel ja’abo’obe’, moson ja’e’ mantats’ u kóolik plásticos tak tu’ux yaan nojoch peteno’ob, ti’ ku k’uchulo’ob tu’ux ts’o’ok u k’aaba’inta’al beey vórtice de residuos del Pacífico Sur.

X-xak’al xook Jennifer Lavers tu beetaj yáax xaa’kalil te’e peteno’ tu ja’abil 2015, te’elo’ tu yilaj kex 700 u xéexet’aj plástico por metro cuadrado, ti’ yóok’ol kaabe’ leti’e’ tu’ux ku asab múuch’ul ba’ali’.

Ku jach talamtal ba’al tumen u yúumbal ja’e’ ku beetik u xiixchajal plásticos, ts’o’okole’ jach talam u luk’sa’al, óoli’ mix chika’ani’, ba’ale’ séeba’an u jaanta’al tumen ch’íich’o’ob wa áako’ob.

Winal máaniko’ Laverse’ tu jo’olbesaj jump’éel meyaj te’e peteno’ ti’al u mo’olol plásticos, ka’ap’éel p’is k’iinil úuch meyaji’ yéetel jóok’sa’ab ka’ap’éel u toneladasil plástico.


Léelo en español haciendo clic aquí.