Xak'al xíimbal

Fabrizio León Diez
Oochel
K'iintsil

Lunes 5 ti' agosto, 2019
Isla Muertos, Arrecife Alacranes, Yucatán.

Xaak’ale’ ku káajal le ken je’ets’ek ba’ax u beelal a bin. Yaan k’iine’ tumen ma’ bululbáab máakechi’, yéetel tumen ti’ ku yúuchul ich k’áak’náab, ti’al u yila’al bix u chu’ukul chakay tumen maaya’ob.

Chakay ich k’áak’náabe’ óoli’ je’ex síina’an ich desierto; jela’antak.

Máaxo’ob chukik wa ts’onke’, láayli’ jela’antak. U ki’ichkelmil u mejn ik’elo’obe’ mina’an u p’iisil ts’o’okole’ ku ja’ak’sik u yóol máak, ts’o’okole’ u jats’utsilo’obe’ óoli’ juntáakalili’ yéetel ba’ax u beelo’ob biológicamente.

Desierto’obe’ tikin k’áak’nabo’ob, ts’o’okole’ arrecifee’ jump’éel nojoch ka’an buulul yéetel corales, ba’ale’ yaan u k’uchul u k’iinil u p’áatalo’ob beey u saamil desierto.

Arrecife Alacranes jump’éel u atolónil petenil tu’ux ku chikpajal óoli’ beey jump’éel desierto, ts’o’okole’ u k’aaba’e’ ts’a’aban beeyo’ yóok’lal bix u woojil ba’ax yani’; ku ya’alale’ wa ka’anal u pakta’ale’ ku chikpajal beey u yoochel juntúul síina’an, ba’ale’ beeyxan óoli’ beey juntúul chakay; yaan ba’al u yil tu’ux ku pakta’al yéetel ba’ax ku tukulta’al yóok’lal.

Ka’aj na’akene’, in wíinkilale’ káaj u yaatal tumen táan u beetik jump’éel meyaj ma’ u k’ajóoli’, ts’o’okole’ k’a’anan u ts’áamaj u yóol máak ti’al ma’ u k’askúunta’al mixba’al, le ken jo’op’ok u bin máak ti’ cheeme’ ku múul yantal yéetel kex lajuntúul máak jach kaambana’an ti’ k’áak’náab, u chúumukil máaxo’ob ku bine’ ku meyajo’ob ti’al u yutsil kantúul buzos yéetel juntúul periodista, ba’ale’ ti’al ma’ u k’askúuntik mixba’ale’, jp’áat beey juntúul máak chéen ku cha’an yéetel ma’atáan u péek’, tumen u wíinkilale’ suuk u máan ti’ noj kaaj.

72 horas xáanchaj táan kbin, je’elon wenel ti’ ka’ap’éel cheemo’ob ti’ yanchajo’ob tu bak’pachil u baantail arrecifes Alacranes, tu jóok’bal u k’áak’náabil Progreso, p’el úuchik kk’atik u beel u máan u cheemilo’ob chuk kay yéetel ayik’al yates. Le yáaxo’oba’ leti’ u nooyil ba’ax ken in tsikbata’ yéetel le uláak’o’obe’, tsikbal bíin yanak.

Ti’al juntúul máak ma’ bululbáabi’, je’el bix le táan u ts’íiba’, le xíimbalila’ k’as jela’anpajij tumen ma’ páatchaj in wikil ba’ax úuchij yéetel bix u yila’al ba’al tu taamil ja’, tu’ux ku samal ila’al ba’al tumen sáasil yanik u jejeláas yáalil corales.

Tu taal u píik’il jueves 11 ti’ julio ti’ u ja’abil 2019 ka jo’op’ kbin ti’ jump’éel chan cheem ti’al kkaxtik u nojochil cheemil ti’al kk’a’amal tumen jump’éel tripulación óoli’ jaach naats’ ku máan ti’ le ku tsikbalta’al tumen Emilio Salgari ichil u ts’íibil Sandokan; máako’ob kaambanaja’ano’ob ich k’áak’náab, kuxa’ano’ob chéen yéetel ba’ax k’a’abéet ti’ wíinik, yéetel u tsoolil ba’al unaj u yantal yéetel jump’éel meyaj tu’ux sajbe’entsil yanik kuxtal ts’o’okole’ wa ku beeta’al jump’éel ba’al ma’ patali’, kex tumen jach chichane’, je’el u jach beetik k’aas, maanal ti’ le beyka’aj k’aasil je’el u yantal yéetel k’a’amkach iik’, chak ik’al wa u k’a’amil u yúumbal k’áak’náab.

Jach jele’an u bin máak ti’ jump’éel cheem tu’ux ku yúuchul chuk kay, je’el bix jela’anil xan yanak máak u xíimbaltej; le beetik uk’ul tu’ux páayt’anta’abone’ séeba’an úuchik u súutul ki’iki óolil, tumen je’ tsa’aje’ séeba’an úuchik u léembalo’ob ti’ kchi’, je’el bix u yich máax beetej, tu súutukil táan u babalsutik.

Le beyka’aj xáanchaj buzos táan u ts’áako’ob tu wíinkilalo’ob tuláakal ba’ax k’a’abéet ti’ob ti’al u ch’a’ak u yiik’o’ob ich ja’e’, ku jach aktáantikubáaj yéetel u séebanil úuchik u yokol maayao’ob chuk kaj chéen yéetel iik’ ku páajtal u yokol tu pulmóno’ob.

Yóok’ kabile’, chuk kayo’obe’ ku máano’ob ich ja’ chéen “ichtbil” yéetel jach ma’ ya’ab máak ku bini’. Mix ya’ab xan u nu’ukulo’obi’, úuchbentak u ba’alil yéetel u ki’imak óolalo’obe’ óoli’ je’ex u ti’al juntúul acupunturista.

Tu k’abo’obe’ chakaye’ óoli’ beey juntúul ik’el je’el bix juntúul nojoch síina’an luba’an. Le ken xo’otoke’, ku ja’atsal u nej ti’ u pool, ba’ale’ wa ku sa’atal u yich máake’ je’el u sa’atal máakalmáak u jach k’a’ananil yéetel jats’uts.

U leelemil buzos le ken jóok’ko’ob ich ja’e’, óoli’ je’el bix u paakat juntúul chan paal táant u kaxtik ba’ax beetik u ki’ óoltal wa je’ex u yich juntúul chokoj pool máax táan u suut tu yóole’.

Láayli’ beey u yóolo’ob le ken búuluko’ob ich ja’, tu’ux u paakato’obe’ ti’ yaan ti’ lu’umil cheem ba’ale’ chéen ku chikbesik saajkil ku yu’ubal; óoli’ je’ex ken ts’u’uts’ak chamale’ táanil ti’ u yokol máak ti’ jump’éel quirófano wa le ken jóok’oki’.

Ku páajtal u xíimbalta’al ka’atéen u petenil Pérez, tu’ux u sáasile’, u faroile’, jump’éel ba’al suuk u yila’al yéetel u xik’nal ch’íich’, beey jump’éel jats’uts juumil ti’ u filarmónica caribeñail.

Ka’ane’ óoli’ beey u woojil síina’an yéetel chakay, je’el bix múuyal yéetel corales; jela’antak.

Sáasil wáaj ba’ax kin wa’alik .