Hiroshima, 74 ja'ab

Ap
Oochel Ap
K'iintsil

Tokio, Japón
Miércoles ti' agosto, 2019

Hiroshima tu k’a’ajsaj tu k’iinil martes 74 ja’ab wáak’ak bomba atómica te’ kaajo’, beeyxan t’aanaj u ja’ala’achil le kaajo’ tu’ux ku k’áatik ka’aj xu’ulsa’ak tuláakal bombas nucleares.

Ichil u t’aane’ tu k’áataj ka’aj anchajak jets’ óolal, Kazumi Matsui ku tukultike’ yaan talamil tumen táan u líik’il jumpéel política ku ya’ala’al ti’ nacionalismo beeyxan tu payalt’antaj tuláakal jala’acho’ob uti’al u meyajo’ob ka’aj xu’ulsa’ak yóok’ol kaab tuláakal armamento nuclear.

Tu k’áataj ti’ u noj ja’alachil Japón ka’aj u ch’a’aj u t’aan tuláakal máax loobita’ab ka’aj wáak’ le bomba atómica yéetel xan ka’aj u joronts’íibto’ob jump’éel mokt’aan ti’ Naciones Unidas tu’ux ku ya’alik u xu’ulul tuláakal armas nucleares.

Le loobilo’ úuch tu k’iinil 5 ti’ agosto tu ja’abil 1945 tumen bomba estadounidense, tu kíimsaj 140.000 máak. Óoxp’éel k’iin ts’o’okoke’ uláak’ 70.000 máak kíimiko’ob tu kaajil Nagasaki tu yo’ok’sal jumpéel bomba je’el bix le yáax wáak Hiroshimao’, le ka’aj ts’o’ok le je’elo’ Japóne’ tu k’ubajubáaj, leti’ beet u xu’ulul Segunda Guerra Mundial.

“Tene’ juntúul máax loobilta’an
Hiroshima láayli’ kuxa’ane’/
je’el tu’ux ka’aj xi’ikene’ / yaan
in ts’áak ojéeltbil ba’ax úuchij
/ beeyxan yaan in k’aay yéetel
tuláakal in puksi’ik’al/ ¡xu’ulsa’ak
tuláakal ba’atelil yóok’ol kaab!”
(Sadako Kurihara); Kin tsikbaltik
ba’ax úuch Hiroshima (junxéet’).

Léelo en español, clic aquí.