Ichil u k'iimbesa'al 50 ja'ab ch'a'abak u yoochel The Beatles t'u'ulpach máako'obe' tu cho'bankúunso'ob u bejil 'Abbey Road'

EFE
Ocheel Reuters
K'iintsil

Londres, Reino Unido
Viernes 9 ti' agosto, 2019

Ubejil u kaajil St John’s Wood je’el u ya’ala’al chéen je’el máakalmáak bejile’ chéen ba’ale’ jump’éel k’iin ti’ le ja’abo’ ku k’éexel u kuxtal, le k’iin je’elo’ ya’ab máako’ob xíimbaltik le ku ya’alal paso de cebra tu bejil Abbey Road le je’ela’ uti’al u yéets’tiko’ob jump’éel oochel jach k’ajóolta’an, u yoochel jump’éel meyaj tu jóok’saj múuch’ paaxil The Beatles tu ja’abil 1969.

Le juevesa’ ya’ab máako’ob tu much’ajuba’ob uti’al u k’iimbesa’al 50 ja’ab ch’a’abak le oochel tu wíinalil agosto tu ja’abil 1969 tumen aj ch’a’aj oochel Iain Macmillan beeyxan uti’al u beeta’al jump’éel chíimpolal ti’ le múuch’ paax ku taalo’ob tu noj kaajil Liverpool, te’ k’iino’oba’ láayli’ jach kuxa’an u paaxe’

Uti’al u k’iimbesa’al le k’iin je’elo’ t’u’ulpach máako’ob ku yéets’tiko’ob le múuch’ paaxil Beatles k’ucho’ob tak te’ kúuchil bej ku k’aaba’tik Abbey Road.

“Chéen 10 minutos tu biinsaj u táabsa’al le oochelo’obo’ chéen ba’ale’ tak bejla’e’ láayli’ ku líik’sik óole’” beey tu ya’alaj Richard Porte ti’ Efe.

Ku ya’alik Porter juntúul máax xíimbalkúunsik ajxíimbalo’ob te’ noj kaaj le tu’ux ch’a’ab le oochel k’ajóolta’an bey paso de cebra ti’ Abbey Road jump’éel kúuchil tu’ux jach ya’ab u ch’a’abal u yoochel tu kaajil Londres. “maanal ti’ 300 mil máak ku máan te’ bejo’, míin ku k’uchil 1000 máak sáansamal”.

U takmaj u nook’o’ob tu’ux yaan u yoochel le múuch’ paaxil Beatles yéetel táan u k’ayiko’ob jejeláas k’aay je’el bix Hey Jude wa She Loves You, paalal, taánkelem yéetel nukuch máako’ob tu beetajo’ob jump’éel noj chíimpolal yéetel táan u tsikbaltiko’ob jejeláas ba’al tu yo’ok’sal le múuch’ paaxilo’.

“In wa’alike’ mix leti’ob tu tukultajo’ob wa ya’ab ba’al ken u k’exo’ob yóok’ol kaab”, máax ku beeta’al jump’éel chíimpolal tu yo’ok’sal u meyaj kex ts’o’ok u máan 50 ja’ab, mix Elvis”, ku ya’alilk.