Ku ba' atel judío'ob yéetel musulmano'ob tu yo'ok'lal kili'ich k'iino'ob

La Jornada Maya
Oochel Afp
K'iintisl

Israel
Lunes 12 ti' agosto, 2019

Ajkanan kaajilo’ob israelí tu káan je’ek’abto’ob u k’íiwikil Mezquitas tu’ux bejla’e’ úuch jump’éel xwo’ok’il tu’ux maanal ti’ 65 palestino’ob loobilta’abo’ob ichil u máank’iinil musulmán Eid al Adha, bey tu ts’áaj k’ajólltbil “Yedioth Ahronoth”.

Ti’ le je’ela’ kantúul ajkanan kaajilo’obe’ loobil ta’abo’ob ichil le xwo’ok’ila’, anchaj u meyajti’ob granadas yéetel uláak’ ba’alo’ob uti’al u yiliko’ob wa ku jets’tal junmúuch’ máako’ob ku líik’tsik u t’aano’ob tumen ma’ u k’áato’ob ka táakpajak judío’ob yano’ob tu yookbal le kúuchila’ beeyxan ma’ u k’áat ka’aj okoko’ob te’ k’íiwiko’o’.

Ti’ le xwo’ok’ila’ loobilta’ab ya’ab judío’ob beey tu ts’áaj k’ajóoltbil u ts’aaj péektsilil le kaajo’ ‘The Jerusalem Post’, chéen ba’ale’ u jala’achilo’ob le kaajo’ ma’ u ya’alo’ob jach ba’ax úuchi’.

Ichil le maanal ti’ 65 máako’ob loobilta’ano’obo’ ti’ yaan u jo’olpóopil Waqf Islám ti’ Jerusalén, leti’ le mola’ayil jets’ik ba’ax kúuchilil ku je’ets’el ki li’ichil uti’al Musulmano’ob te’ kaajo’, beey úuchik u ya’alik u ts’aaj péektsilil le kaajo’.

U noj cha’anil musulmane’ keet yéetel xan le noj cha’anil ku beetik le judío’ob Tisha B’Av le beetik le ajkanan kaajo’obo’ ma’ tu cha’aj u máan judío’ob tak te’ k’íiwik k’ajóola’an bey Mezquitaso’ k’ajóolta ́an tumen le judío’ob bey Monte del Templo, lela’ uti’al ma’ u yúuchul ba’atel.

U k’íiwikil Mezquitas maantats’ k’ala’an uti’al ajxíimbal ma’ musulmano’ob tu k’iinil u cha’anil Islámi’, chéen ba’ale’ tumen le ka’ap’éel noj k’iimbesaj múuch’ u k’iinilo’oba’ u mola’ayilo’ob judía u k’áatmajo’ob u páajtalil u yokolo’ob te’ kúuchilo’.