Kíim u asab k'a'anan máakil paxik cumbia tu lu'umil México

66 u ja'abil ka'achij

La Jornada Maya
Oochel Cuartoscuro
K'iintsil

Monterrey, Nuevo León
Jueves 22 ti' agosto, 2019

Tu ja’atskabil jo’oljeak miércolese’ yanchaj u séeb biinsa’al tu kúuchil ts’áakyaj San Vicente, tu noj lu’umil Monterrey, jts’íib k’aay yéetel j-acordeonil paax Celso Piña, úuchik u je’elel u puksi’ik’al.

Jpaaxe’ k’ajóolta’ab beey El rebelde del acordeón wa Cacique de la Campana, juntúul ti’ le máaxo’ob káajs, yéetel u múuch’il Ronda Bogotá, u xa’ak’besik tropical juumilo’ob ti’al u tsa’atsayik yéetel uláak’ u jejeláasil juumilo’ob yéetel paax je’el bix norteña, ska, reggae, hip-hop, sonidero, ichil uláak’o’ob.

66 u ja’abil ka’achij, juntúul máak tu jach péektsiltaj u cumbiail Colombia tu noj lu’umil Monterrey. Maanal 35 ja’abo’ob máan meyaj, le beetik chíimpolta’ab tu lu’umil México yéetel América Latina.

Ti’ jump’éel k’áatchi’ beeta’ab tumen La Jornadae’ tu ya’alaj: “Paax táan in beetik walkila’ ma’ xan vallenatoi’; xa’ak’an paax, yaanal ba’al. Ba’ale’ le ken úuchuk conciertose’ kpaxik cumbia tumen ku k’áata’al tumen kaaj”.

Beyxan múul meyajnaj tu tséel roqueros yéetel uláak’ máako’ob paxik jejeláas ba’al, je’el bix tu ya’alaj juntéenak: “Yéetel Alex Lorae’ tk’ayaj Más allá del sol; yéetel Alex Synteke’ le ba’ax ku taal tu paach Aunque no sea conmigo, k’aaba’inta’an Herido; tu tséel Lila Downs, El pescador, jump’éel úuchben k’aay”, ichil uláak’o’ob.

U paaxe’ tu k’ujsaj tak 30 u p’éel noj lu’umo’ob yéetel u xíimbal meyajil Cumbia por el mundo; ts’o’okole’ k’aaynaj ti’ cha’ano’ob je’el bix nternacional Cervantino, Cumbre Tajín, Vive Latino, Machaca Fest, WOMEX, World Village Finlandia, Air Bag Festival Bélgica, Rock al Parque Colombia, ichil uláak’o’ob.