Tak 35 ja'abo'ob tukulta'an je'el u kuxtal 'trans' máako'ob: CIDH

Boonil ca.ma.leon
K'iintsil

Viernes 30 ti' agosto, 2019

Péech’ óol ku yantal yóok’ol LGBTI máako’obe’ ku beetik u p’a’atalo’ob paachil ts’o’okole’ yaan k’iine’ ku sa’atal tak u kuxtalo’ob, beey tu ya’alaj u xrelatorail Asuntos de Personas Lesbianas, Bisexuales, Gay y Transgénero de la Comisión Interamericana de Derechos Humanos (CIDH), Flávia Piovesan.

Tu súutukil úuchik u tse’ektik El sistema interamericano de derechos humanos y las cortes nacionales, interacciones para la garantía de los derechos de las personas LGBTI, Flávia tu ya’alaje’ ba’ax ku yúuchul tu noj lu’umil Méxicoe’ ma’ jumpáay yaniki’.

Tu ya’alaj tu noj lu’umil Méxicoe’ yaan sáasil yéetel éek’jolch’e’en yóok’lal bix u ya’alal u kaláanta’al LGBTI máak, tumen kex yaan a’almajt’aano’ob jeets’el ti’al u yutsil yéetel u tojbe’enil le máako’oba’, chikpaj chéen ichil u ja’abil 2013 yéetel 2016e’ kíinsa’ab 202 u túul máak ma’ heterosexualo’ob chéen yóok’lal ba’ax uts tu yicho’ob yéetel yóok’lal bixo’ob.

Beey túuno, x-abogadae’ tu ya’alaj u yantal loobilaj k’ajóolta’an beey transfóbica yéetel homofóbica ku beetik, le ken jóok’sa’ak promedioe’, trans máako’obe’ chéen 35 ja’abo’ob tukulta’an ku kuxtalo’ob, ka’alikil máaxo’ob ma’ táaka’ano’ob ichil LGBTI máake’ je’el u k’uchulo’ob tak 79 ja’abo’ob wa ko’olel máak, yéetel tak 73 wa xiib.