"Jeets'el, u ja'atsal bix u yantal taak'in ti' político muuk'": AMLO

Alma E. Muñoz, Alonso Urrutia, Néstor Jiménez y Emir Olivares
Oochel gob.mx
K'iintsil

Lunes 2 ti' septiembre, 2019
Ciudad de México

Tu káajbal u tse’ekil informe de gobierno, jala’ach Andrés Manuel López Obrador tu ya’alaje’, ti’al u chikpajal u káajbal Cuarta Transformación, “jeets’el u ja’atsal u muuk’il u yantal taak’in ti’ político muuk’. Jala’ach te’e k’iino’oba’ u chíikulal tuláakalo’on, ayik’al beyxan óotsil máak, máax ku jaajkúunajo’ob yéetel máax jáalk’ab tuukul, je’el bix xan tuláakal mexicanoilo’ob, tu’ux ku p’a’atal tséelik tuukulo’ob, miatsil, kaaj tu’ux siijil máak, tu’ux náakan u xook máak wa beyka’aj ku náajalta’al”.

Beey túuno’, tu kúuchil Palacio Nacional jala’ache’ tu ts’áaj u níib ólalil ti’ tuláakal máaxo’ob tu much’ajuba’ob u yu’ubo’ob u t’aan, u yuumil mola’ayo’ob, aj jo’olbesaj péektsilo’ob, kaaj, aj jo’olbesaj mola’ayo’ob yéetel aj meyajo’ob; te’elo’ jala’ache’ tu ya’alaj u k’a’ananil u jeel tukulta’al bix najmal u túumbenkunsa’al u meyajil jala’ach, le beetik tu páayt’antaj Congreso ti’al ka páatak u éejenta’al k’eexilo’ob ts’o’ok u túuxtik te’elo’.

“Kin páayt’antik Poder Legislativo ti’al ka u tsel tuláakal ba’ax k’aatik u beel a’almaj t’aan, ti’al ka páatak u k’áatchibta’al kaaj yéetel ti’al xan ka tse’elek fuero ti’ máaxo’ob beetik funcionario público”, beey tu ya’alaj tu táankabil Palacio Nacional, tu’ux tu ya’alaj “ma’atáan in xokik tuláakal, tumen u machmaj jump’éel piim áanalte’ tu’ux laj ts’íibta’an informe.
Tu ya’alaje’ “yaan jump’éel jaaj Estado de derecho. Kk’áat ka jaajchajak u tuukulil ‘tu jáal a’almaj t’aane’, mixba’al; yóok’ol a’almaj t’aane’, mixmáak’.

Jala’ache’, tu ya’alaj “ma’atáan u táakpajal ti’ yaanal muuk’ilo’ob; ku chíimpoltik ba’ax ku je’ets’el tumen u jala’achil noj lu’umo’ob yéetel noj kaajo’ob, ts’o’okole’ ma’ xan táan u yoksikubáaj ti’ mola’ayo’ob ku meyajo’ob tu juunalo’ob; ku yilik ma’atech u táakbesikubáaj ti’ múuchkabilo’ob meyajo’ob yéetel partidos políticos”.

Táan kxíimbaltik, tu ya’alaj, “u bejil democracia jaaj. Yaan u xuupul, ti’ u wakp’éel ja’abil in jala’achil u su’utsil k’aasil ba’al ku beeta’al le ken yanak yéeytambal, yaan xan u k’a’alal máax beetik, ts’o’okole’ ma’ xan táan u páajtal u bo’otal u jóok’ol máak”.

Beyxan tu ya’alaj ku chíimpoltik jáalk’abil tu yóok’ol ba’ax ma’ táan u cha’abal u beeta’al.