Mexikanoilo'obe' tu píitmáansajo'ob medallero; yanchaj 158 chíikulalo'ob tu Parapanamericanoil Lima

Oochel Conade
K'iintsil

Ciudad de México
Martes 3 ti' septiembre, 2019

Ichil u yáalkabil bulukp’éel k’iino’ob keetile’ u noj lu’umil México tu ye’esajubáaj yéetel 184 u túul máak ku beetik deporte ti’ óoxlajunp’éel disciplinas ichil u keetil Juegos Parapanamericanos Lima 2019, yóok’lal le je’elo’ jp’áat tu yóox kúuchil ti’ noj lu’umo’ob asab ya’ab medallas tu náajaltaj úuchik u yantal: 55 oro, 58 plata yéetel 45 bronce, tu ts’ooke’ yanchaj 158 u p’éelal, chéen tu yáanal Brasil yéetel Estados Unidos. Yéetel le je’ela’ páatchaj u píitmáansiko’ob ba’ax ts’o’okili’ u yáax beetiko’ob Guadalajara tu ja’abil 2011, tumen náajalta’ab 50 u p’éel medallas.

Ichil u múuch’il deportistaobe’ táaka’an medallistas paralímpicos yéetel máako’ob ku meyajo’ob ti’al u líik’sik uláak’ máako’ob ichil deporte paralímpico, yaan xane’ ts’o’ok u táakpajalo’ob, kantéen, jo’otéen wa tak waktéen ti’ le keetil ku beeta’al América, le beetik béeychaj u ya’abkunsiko’ob medallas tu náajaltajo’ob yéetel tu jets’ajo’ob túumben récords.

Ti’ natación náajalta’ab u asab ya’abil medallas, tumen yanchaj 83 u p’éelal jatsa’an beya: 27 oro, 33 plata yéetel 23 bronce, yóok’lal waxakp’éele’ jmáan ti’ le beyka’aj náajalta’ab Toronto 2015.

Ka’atúul ajbáabo’ob Naomi Somellera yéetel Diego López, tu náajaltajo’ob bulukp’éel medallasil oro yéetel yanchaj ti’ leti’obe’ tu jets’ajo’ob túumben récords. Tabasqueñaile’ wakp’éel tu náajaltaj, ts’o’okole’ veracruzanoile’ jo’op’éel; ts’o’ok ka’ach u náajaltik uláak’ jump’éele’ ba’ale’ descalificarta’ab.

Naomie’ síij Comalcalco, tu chikbesaj u noj lu’umil Veracruz. Junk’aal u ja’abil. "Jach ki’imak in wóol yéetel ba’ax tin we’esaj te’elo’. U jaajile’ (Limae’) jach uts óolen tu p’atajen”, tu ya’alaj xbáab ka’aj k’uch Ciudad de México láak’inta’an tumen Vianney Trejo, máax tu náajaltaj medallas xan. Te’e k’iino’ob xana’ yaan u bino’ob Londres ti’al u ketiko’ob Mundial.

U ya’abil xbáabo’obe’ -yaane’ ma’ maanal 25 u ja’abile’- tu náajaltajo’ob ichil kamp’éel tak wakp’éel medallas, je’el bix Gustavo Sánchez yéetel Luis Armando Andrade. Sáansamal náajalta’ab wa ba’ax tumen mexicanoilo’ob, mix jump’éel k’iin jp’áat jóojochil.

Ti’ atletismoe’ léeyli’ beey úuchiko’, tu much’aj 50 u p’éel medallas yóok’lal deportistaob je’el bix xch’iin jabalina yéetel bala, María de los Ángeles Ortiz yéetel Rebeca Valenzuela, núup’o’ob yiknal Eduardo Ávila, Lenia Ruvalcaba, je’el bix xan Brayan Valencia yéetel Raúl Ortiz.

Powerlifting, uláak’ jump’éel disciplina tu’ux yanchaj u ya’abil chíikulalo’ob úuchik u máan táanil Amalia Pérez, Perla Bárcenas yéetel José de Jesús Castillo óoxtúul máako’ob tu láak’intajo’ob le uláak’o’ob náajalnajo’ob xan.

Ti’ tenis de mesa yanchaj óoxp’éel oro yóok’lal María Sigala, Claudia Pérez yéetel Víctor Reyes, beyxan óoxp’éel platas, ti’ bocciae’ yanchaj yáax kúuchil yóok’lal Eduardo Sánchez.