Ts'o'ok u máan junja'ab elek Museo Nacional de Brasil, wakila' táan u líiksa'al nu'ukul p'áatij

Ts'íib yéetel oochel Agencia Brasil
K'iintsil

Río de Janeiro, Brasil
Miércoles 4 ti' septiembre, 2019

Ts’o’ok u máan junja’ab elek Museo Nacional, ti’ yaan Quinta da Boa Vista. Úuch tu k’iinil 2 ti’ septiembre ti’ u ja’abil 2018, ba’ale’ yaan jayp’éel utsil ba’al táan u yojéelta’al yéetel táan u chan líik’sik u yóol aj xak’al xooko’ob ku meyajo’ob te’elo’. Juntúul ti’ leti’obe’ xka’ansaj Luciana Carvalho, ku meyaj ti’al u ka’a líik’sik úuchben nu’ukulo’ob p’áat yáanal tuláakal ba’ax níik te’elo’, tu ya’alaje’ ts’o’ok u yutskíinsa’al jayp’éel k’a’anan nu’ukulo’ob, je’el bix u baakel wíinik, tu’ux yaan xan u káakach u baakel u pool Luzia, u asab úuchbenil baakel kaxta’an ichil continente americano.

Carvalho tu beetaj jump’éel tsikbalil yóok’lal le nu’ukulo’ob páatchaj u líik’sa’al tu yáamil ba’ax níik Museo Nacional, egipcia nu’ukulo’ob ti’alinta’an tumen u mola’ayil Observatorio Nacional, tu baantail São Cristóvão, tu xamanil Río.

Beyxane’, tu ch’a’achibtaj béeychaj u jóok’sa’al xan paleovertebrados yéetel nu’ukulo’ob ku yáantaj ti’al u kaxta’al túumben especies, k’aaba’inta’an holotipos.

‘‘Walkila’ táan kmeyaj yéetel u baakel wíinik, tumen ma’atech u séeb k’astalo’ob kex tumen ooxol. Ts’o’ok xan klíik’sik uláak’ paleovertebrados kti’al, ma’ chéen dinosauriosi’, beyxan yaan jaytúul mamíferos yéetel holotipos jok’a’an ti’ le ba’alche’oba’, beyxan u túulisl múuch’ ti’ u holotipos paleontologíail invertebrados, le je’elo’oba’ líik’sano’ob ti’ jump’éel kúuchil ma’ níik’ mix k’aschaji’. Le je’elo’ jump’éel tajan ba’al ma’alo’ob t-ojéeltaj”.

K’a’anan áantaj ti’al u jeel líik’sa’al

Máax jo’olbesik kúuchil e’esajil, Alexander Kellner, tu ya’alaje’ ts’o’ok k’u’ubul k’a’anan áantaj ti’al ka páatak u meyaj u múuch’il xak’al xooko’ob.

“Ti’al u jaatsil entomologíae’ ojéela’an yaan u k’u’ubul 20 u p’éel nu’ukulo’on ti’al u chukik óoli’ 23 mil u p’éelal; le je’elo’ jump’éel ti’ le jaatsilo’ob tu’ux asab k’aschaj ba’al. Ti’al vertebradose maanal ti’ 500 u p’éel ba’al k’u’ubij ti’ u taal ti’ u jejeláas baantail Brasil. Tu jaatsil geología yéetel paleontologíae’ yaan ka’ach ba’alo’ob ch’a’aban tumen Receita Federal tukulta’an u k’u’ubul ti’ Museo Nacional. Kin beetik páayt’anil ti’al ka p’áatak mantats’ beya’: wa tumen yaan wa ba’ax ch’a’abane’, unaj u su’utul ti’ u mola’ayil Museo Nacional.’’

Kellner ku ya’alik u kúuchil áanalte’ob Francisca Keller, ti’ u nu’ukbesajil Programa de Posgrado en Antropología Social, tu’ux yaan ka’ach kex 37 mil ju’uno’obe’, k’aalal ka’achij ts’o’okole’ laj eelij, chéen ba’ale’ walkila’ táan u yutskíinsa’al.

Tu kúuchil áanalte’ob Francisca Kellere’ yaan kex 10 mil 500 u p’éel ju’uno’ob k’uubul te’elo’; yaan uláak’ 8 mil táan u biinsa’alo’obi’.”

Beyxan tu ch’a’achibtaj taak’in jóok’sa’an ti’al meyaj tumen Coordinación para el Mejoramiento del Personal de la Educación Superior, tu’ux yaan 2.5 millones de reales ti’al ka beeta’ak xak’al xooko’ob te’e kúuchil e’esajilo’ yéetel u yáantajil Fundación Carlos Chagas Filho para el Apoyo a la Investigación en Río de Janeiro, tu’ux jeets’el u k’u’ubul 3 mil reales lalaj winal ti’al u beeta’al 72 xak’al xooko’ob ichil junja’ab