Xmaaya ts'íib Marisol Ceh Moo tu náajaltaj Premio de Literaturas Indígenas de América 2019

Sandra Gayou Soto
Oochel Raul Angulo
K'iintsil

Guadalajara
Miércoles 11 ti' septiembre, 2019

Tu ja’atskabil jo’oljeake’ k’a’ayta’ab u k’aaba’ máax náajalt u ketlamil Premio de Literaturas Indígenas de América 2019 (PLIA) tu yuktéenil u beeta’al; chíimpolale’ k’u’ub ti’ yukatekail Marisol Ceh Moo, tu táan máax jo’olbesik u mola’ayil Cultura de Jalisco, Giovana Jaspersen, tu’ux táakpaj uláak’ máako’ob ku meyajo’ob ti’ mola’ayo’ob federal yéetel académicas ti’ u noj kaajil Guadalajara.

Gabriel Pacheco Salvador, máax jo’olbesik u múuch’kabil interinstitucional ti’ u chíimpolalil PLIAe’ tu ts’áaj u níib óolal ti’ le óoxtúul máako’ob tu beetaj u juradoilo’ob, tumen tu ts’ooke’ tu ketajubáaj 26 u p’éel meyajo’ob ti’ waxakp’éel noj lu’umo’ob, tu’ux yanchaj 17 u p’éel u máasewal t’aanilo’ob América Latina.

Xmaaya ts’íibe’ tu ya’alaj ku jach níib óoltik úuchik u yéeya’al ti’al u k’u’ubul ti’ le náajalila’, le beetike’ tu ya’alaj “ku beetik u jach yantal in kuuch ti’al in seten meyaj tu yóok’lal káan iik’ ti’ilil ku ts’íibta’al ich máasewal t’aano’ob tu noj lu’umil México, beyxan ti’al in táakmuk’tik yéetel in ts’aatáantik káan iik’ ti’ilil ich máasewal t’aan yaan yóok’ol kaab”.
Chíimpolale’ yaan u k’u’ubul le ken beeta’ak u cha’anil Feria Internacional del Libro de Guadalajara, xts’íib Ceh Mooe’ yaan u k’amik jump’éel ju’un ku chíimpolal, jump’éel estuatilla yéetel 300 mil pesos.

PLIAe’ ku chíimpoltik máaxo’ob ku meyajo’ob yéetel ku ts’íibo’ob “tumen yéetel ba’ax suuk u beetiko’obe’ ku suukbesiko’ob u yúuchul t’síib” ich máasewal t’aano’ob, beey tu ya’alaj Alejandra Rodríguez Martínez.

Alejandra Rodríguez Martíneze’ leti’ máax jo’olbesik políticas lingüísticas ichil u mola’ayil Instituto Nacional de Lenguas Indígenas, INALI, leti’e’ táakpaj tu jeel Juan Gregorio Regino, u nojochil INALI. Tu ya’alaje’ maanal ti’ 40 millonesil máako’ob kuxtatik máasewal kaajo’ob tu’ux ku t’a’anal maanal ti’ 500 u p’éel t’aano’ob, tu noj lu’umil Méxicoe’ ti’ yaan u 6.8 por cientoil máaxo’ob ku t’aniko’ob jump’éel ti’ le 68 máasewal t’aano’ob yaan yéetel u 364 u p’éel u jejeláasil.