Tu lu'umil Egiptoe' kaxta'ab u moomiasil miiso'ob, léeono'ob yéetel uláak' ba'alche'ob

Ap
Oochel Afp
K'iintsil

El Cairo, Egipto
Jueves 28 ti' noviembre, 2019

Aarkeeologo’ob ku meyajo’ob tu lu’umil Egiptoe’ tu kaxtajo’ob ukp’éel muknáalo’ob ti’ u k’iinilo’ob k’ajóolta’an beey Edad Faraónica, le je’elo’oba’ ti’ kaxta’abo’ob naats’ ti’ u noj kaajil, El Cairo, ts’o’okole’ ichile’ yaan kex lajka’ap’éel u moomialo’ob miis, u mejenil léeon yéetel jaytúul áayimo’ob, ti’ yano’ob ka’ach tu tséel u estáatuatsil che’ beeta’an yéetel u woojil uláak’ ba’alech’ob yéetel ch’íich’o’ob.

Ba’ax kaxta’abe’, j ts’a’ab k’ajóoltbil ti’ jump’éel x chukul e’esaijl beeta’ab tu yook jump’éel k’a’anan piraamidée, Djoser ti’ yaan tu kaajil Saqqara, tu noojolil u noj kaajil Egipto, naats’ te’e tu’ux kaxta’ab le moomiaso’ yéetel uláak’ ba’alo’ob ti’ le úuchnen kaajo’.

Beyxan e’esa’ab ka’ap’éel u moomiasil ichneumon, wa le k’ajóolta’an beey mangosta egipcia, ba’ale’ to’ano’ob ichil u nook’il lino yéetel le uláak’ u nu’ukulil che’ob, je’el bix u ko’olebil Sekhmet, máax chikbesa’ab yéetel u wíinkilal juntúul ko’olel ba’ale’ u poole de léeon. Máaxo’ob beetik jejeláas xaak’alilo’ob yóok’lal Sekhmete’ (1390-1252 a. C.) ku ya’aliko’obe’ u ko’olebil ba’ateltáambal yéetel xan leti’ máax xu’ulsik máaxo’ob u p’ekmaj yuum k’iin, Re.

Beyxan kaxta’ab u xóoxot’aj papiróo tu’ux chikbesa’am u ko’olebil Taweret, ts’a’aban yéetel u woojil juntúul íipopotamóo ba’ale’ u neje’ de áayim.

Ti’ tuláakal ba’ax kaxta’abe’, u ya’abe’ miis ku chikbesik, le beetik séeba’an u yila’al u k’a’ananil miiso’ob ichil u tuukul úuchben éegipsio’ob, ts’o’okole’ ku páajtal u yila’al xan bix u kili’ichkúunsa’al Bastet. Uláak’ estaatua’obe’ ku chikbesiko’ob juntúul x nuk wakax yéetel juntúul k’ili’.

Aj xak’al xooko’obe’ mantats’ u kaxko’ob u moomiasil miiso’ob, ba’ale’ u yantal juntúul léeon ichilo’obe’ jach jela’an. Tu ja’abil 2004e’, kaxta’ab u yáax chuka’an baakel juntúul léeon, ti’ yaan ka’ach Saqqara, ts’o’okole’ le je’elo’ ku chikbesik bix u kili’ichkúunsa’al ka’ach xan le ba’alche’a’.

Yéetel xaak’alil beeta’ab yóok’ol le ba’axo’ob kaxta’abo’obe’ páatchaj u je’ets’el yanchajo’ob ichil u k’iinilo’ob Período Tardío (664-332 a. C.).

Ichil u k’aaxilo’ob Saqqarae’ tu’ux kaxta’ab tuláakal le ba’alo’oba’, líik’sa’ab kex 11 u p’éel piraamidées, ba’ale’ yanchaj xan ya’ab muknáalo’ob ti’ úuchben máako’ob, ti’ jts’a’ab u yáax ch’i’ibalil le kaajo’ (2920 a. C.-2770 a. C.) ba’ale’ beyxan tak kaaj kuxlaj ichil u k’iinilo’ob copto (395-642).

"Táan k kaxtik ya’abach nu’ukulo’ob ti’ le kaaja’”, beey úuchik u ya’alik u miinitroil Antigüedades Khaled el-Anany. “Ti’ tuláakalo’obe’ yaan k’a’anan ba’alo’obi’, beey in wilik yéetel egiptológico paakat".

Mostafa Waziri, máax beetik u secretarioil general ti’ Consejo Supremo de Antigüedades, tu ya’alaj ti’ máaxo’ob ts’íibtik péektsilo’obe’, ichil ba’ax bin kaxta’ab Saqqarae’ yaan xan u moomiasil mejen ik’elo’ob, le je’ela’ leti’e’ yáax kaxta’ano’ob te’e baantaa’.