Ku ya’abta’al máaxo’ob ku pa’ak’al ti’ob COVID-19 ti’ América yéetel Medio Oriente

Ts'o'ok u je'ets'el yaan ti' Pakistán yéetel Brasil

AFP
Oochel AP
K'intsil

Roma.
Jueves 27 ti' febrero, 2020.

Te’e k’iino’oba’ u túumben pak’be’en k’oja’anil coronavirus tóop tu lu’umil Chinae’ táan u bin u k’i’itpajal ti’ uláak’ tatáanxel lu’umilo’ob; tak ma’ sen úuche’ káaj u yantal tu lu’umil Italia, ba’ale’ tak walkila’ ts’o’ok u jéets’el yaan máax k’oja’an ti’ u lu’umil Grecia, Pakistán yéetel Brasil, le u ts’ooka’ leti’ u yáax lu’umil Latinoamérica tu’ux táan u káajal u yantal. Le beetike’ u mola’ayil Organización Mundial de la Salud tu k’áatóoltaj ka séebkunsa’ak ba’ax táan u beeta’al ti’al u ts’aatáanta’al.

Tu noj k’áaxil Europae’, jéets’ u yáax yantal juntúul ko’olel yeetel COVID-19, úuchik u suut tu kaajal ka’aj luk’ tu xamanil Italia; tu jo’oloj túune’ ojéelta’ab yanchaj xan Austria, Croacia yéetel Suiza. Tu lu’umil Alemaniae’ yanchaj u jéets’el u p’áatal máak ich kuarentena tumen yaan máako’ob ma’ ojéela’an wa leti’e’ k’oja’an yaan ti’obo’ wa ma’, tumen láayli’ nuup’ul yéetel Italia. Beyxan tu lu’umil Franciae’ je’ets’ yanchaj u ka’atúul máak máax kíim tu yóok’lal COVID-19.

Tak walkila’ chéen ti’ u noj k’áaxil Antártida ma’ yanak mixmáak tsa’ayak ti’ le k’oja’anila’.

U yáax ministroil Giuseppe Conte tu k’áataj ti’ lu’umo’ob bak’pachtike’ ka’aj bin u paklan áatikubáajo’ob ti’al ma’ u k’i’ik’itpajal pak’be’en k’oja’an. “Pak’be’enile’ ma’ táan u na’atiko’ob wáaj yaan u xuulil kaaj, ma’ táan u je’elelo’ob”, beey úuchik u ya’alik Roberto Speranza, u ministroil Salud, tu súutukil úuchik u beeta’al jump’éel much’tambal tumen Organización Mundial de la Salud yéetel máaxo’ob chikbesik Unión Europea tu noj kaajil Roma.