X ma’ cha’anilo’obe’, jóopsa’ab u k’áakil keetil oliimpikóo báaxal tu lu’umil Tokio

AFP
Oochel AP
K'iintsil

Viernes 13 ti' marzo, 2020.
Grecia.

Yáax juntéen úuchik u jóopsa’al u k’áakil oliimpikóo keetilo’ob x ma’ cha’anilo’obi’. Lik’ul ka’aj káaj u beeta’al báaxalilo’ob tu ja’abil 1984 ma’ yáax úuchiki’, ba’ale’ tu yáanalil nookoy ka’an yéetel u k’aayil ch’íich’o’ob beeta’ab jóopsa’an k’áak’ kex ma’ cha’antab tumen mix máaki’, tumen báaxalo’obe’ tukulta’an yaan u káajal tu k’iinil 24 ti’ julio.

Walkila’, Comité Olímpico Internacional (COI) yéetel Comité Olímpico Griego tu jets’ajo’ob ma’ táan u ts’a’abal cha’antbil ti’ máak tu yóok’lal coronavirus, tumen ts’o’ok u pa’ak’al ti’ 98 u túul máako’ob tu lu’umil Grecia yéetel kíim juntúul máak yóok’lal le k’oja’ana’ ti’ jump’éel ts’akyaj yaan kex 120 kilómetros náachi u kaajil Olimpia.

Tu ja’abil 1984, chéen beey úuchik u jóopsa’al k’áak’, ma’ cha’anta’ab mix seten k’a’aytabi’ tumen máaxo’ob beet tu lu’umil Greciae’ u k’áato’ob u líik’s u t’aano’ob tu táan máaxo’ob beet Juegos Olímpicos tu kaajil Los Ángeles, tumen ma’ ki’imak u yóolo’ob úuchik u jach ko’onoli’.

“Ti’al u jóopsa’al k’áak’e’, k yaj óoltik úuchuk u yantal k beetik chéen ichil jaytúul máak, le je’ela’ chéen táan u beeta’al ti’al u kaláanta’al u toj óolal wíinik”, beey tu ya’alaj máax jo’olbesik Comité Olímpico de Grecia, Spyros Capralos.

Beyxan yáax juntéen ichil táan u beeta’ale’, juntúul ko’olel yaan tu káajsaj u máansik k’áak’ jo’op u ti’al, leti’e’ x griegail Anna Korakaki, u náajalmaj jejeláas oliimpikóo, europeoil yéetel uláak’ u báaxalilo’ob tiro.

K’áak’ jóope’ yaan u k’áata ti’ 31 u p’éek noj kaajo’ob, 15 u p’éel u yúuchben kaajilo’ob Grecia, yaan u náachtal kex 3 mil 200 kilómetros, ti’al u ts’o’okol u máanil tu kúuchil báaxal yaan tu kaajil Atenas, tu k’iinil 19 ti’ marzo, tu’ux yaan u k’u’ubul ti’ u múuch’il báaxal Tokio-2020 le ken jóok’ok u biinbalo’ob Japón.