Ku yéemel u tojol gasolina úuchak u lúubul petróleo ti' yóok'ol kaab

Joana Maldonado
Oochel
K'iintsil

Lunes 16 ti' marzo, 2020.
Quintana Roo

Úuchak táan u yéemel le bajux táan u bo’ota’al ti’al u ma’anal petróleo ti’ yóok’ol kaabe’, ts’o’ok u máan óoxp’éel k’iin éemek xan u tojol gasolina tu lu’umil Quintana Roo; tak 80 centavos u bin u yéemel sáansamal, le beetike’ jach cho’obanaj u ma’anal. Tu noj kaajil Cancún yéetel Playa del Carmene’ p’áat 18 pesos u tojol u litroi’, ka’alikil Chetumal yéetel Bacalare’ óoli’ k’uch 16 u tojol.

Beey túuno’, Chetumale’, máax beetik u jerenteil u gasolinerasil Garabane’, Libia Marzuca Fuentese’, tu ya’alaj ya’ab máak ts’o’ok u jach betik uts ti’ob úuchik u yéemel u tojol le gasolinao’ ti’ le ts’ook k’iino’oba’, tumen beey táan u yúuchul ba’al ti’ u tojol ku ts’a’abal tumen Petróleos Mexicanos (Pemex).
“Le ken jo’op’ok u yúuchul le je’ela’, k distribuidorae’ ku p’íittal xan u tojol le ken u manej, le beetik xane’ ku yantal u konik ma’ ko’oji’, leti’ le ba’ax úuch ti’ le ts’ook k’iino’oba’” beey tu ya’alaj Marzuca Fuentes.

Le beetik kajnáalo’obe’ ts’o’ok u yilko’ob éem u tojol ti’ lalaj gasolineras; tu noj kaajil Chetumale’ yaan tu’ux ku ko’onol 16.97 u litroil Magna; 17.37 Premium yéetel 18.99 Diesel, kex tak le semana máaniko’ maanal óoxp’éel pesos ti’ le je’el u ko’ojilo’.