INAHe’ ku káajsik meyajo’ob ti’al u cho’obol tu beel úuchben kaajo’ob ti’al ma’ u pa’ak’al COVID-19

La Jornada Maya
Oochel INAH
K'iintsil

Juevea 26 ti' marzo, 2020.
Mérida, Yucatán

Yóok’lal ba’ax jets’a’an ti’al u kaláanta’al kaaj ti’ u pek’be’en k’oja’anil COVID-19, u mola’ayil Secretaría de Cultura yéetel Instituto Nacional de Antropología e Historia (INAH) tu káajsajo’ob meyaj ti’al u cho’obol tu beel tuláakal úuchben kaajo’ob p’ata’an u kaláanto’ob, je’el bix Chichén Itzá, Uxmal yéetel Museo Regional de Antropología “Palacio Cantón”.

Meyaj káajsa’abe’ chéen u yáax jaatsil, tu’ux unaj u laj cho’obol tu beel tuláakal le kúuchilo’obo’, ba’ale’ ma’ chéen ti’al le tu’ux ku xíimbalta’al tumen máako’obe’, yaan xan u cho’obol tu beel tak le tu’ux yaan u aj meyajilo’ob le kúuchilo’, ti’al beyo’ le máaxo’ob kun p’áatal u kaláanto’ob úuchben kaajo’obe’ u páajtal u beetiko’ob tu beel yéetel x ma’ sajbe’entsil ti’al u toj óolalo’ob yóok’lal COVID-19.

Tu ka’a jaatsil meyaj ts’o’ok u káajsa’al tumen mola’ayo’obe’, tukulta’an xan u cho’obol tu beel u yúuchben kaajilo’ob Labná, Kabáh, Sayil, Xlapakl yéetel Dzibichaltún. Eduardo López Calzada, máax jo’olbesik Centro INAH tu ya’alaj kex tumen te’e k’iino’oba’ k’ala’an úuchben kaajo’obe’, yaan u beeta’al jejeláas ba’al ti’al u kaláanta’al yéetel u ts’aatáanta’al je’el bix suukile’.