Múuch’kabile’ tu beetaj u tsolts’íibil meyajo’ob beeta’an ich máasewal t’aano’ob yóok’lal COVID-19

La Jornada Maya
Oochel Cuartoscuro
K'iintsil

Martes 31 ti' marzo, 2020.
Mérida, Yucatán

U múuch’kabil ku k’aaba’tik Comunidades Indígenas en liderazgo (CIELO), tu ts’áaj k’ajóoltbil jump’éel tsolts’íib tu beetaj tu’ux u ts’áamaj jejeláas kóom cha’ano’ob beeta’ab ich máasewal t’aano’ob yóok’lal u k’oja’anil COVID-19 táan u yáalkab ti’ yóok’ol kaab ti’ le k’iino’oba’. Tsolts’íib beeta’abe’ mina’an mix jump’éel u tsoolil, chéen ba’ax ku kaxta’ale’ u péektsilta’al ich máasewal t’aano’ob ba’ax je’el u páajtal u beetik máak ti’al u kaláantik u toj óolal ti’ túumben coronavirus; táakpaj jejeláas t’aano’ob ku yu’ubal México yéetel Guatemala.

Múuch’kabile’ tu ya’alaj wa yaan meyajo’ob táan u binetik u ts’a’abale’, je’el u páajtal u táakbesa’al wa ku túuxta’al ts’íib ti’ claudioh@mycielo.org.