Jch’a’a oochel Sebastiao Salgadoe’ tu k’áataj ka ts’aatáanta’ak u máasewal kaajilo’ob Amazonas

La Jornada Maya
Oochel: Afp
K'iintsil

Rio de Janeiro, Brail
Martes 5 ti' mayo, 2020

Jch’a’a oochel sijnáal tu lu’umil Brasil, Sebastiao Salgado yéetel u yatan, Lélia Wanick, tu jóok’sajo’ob jump’éel ts’íibil ti’ Internet, tu’ux ku k’áatiko’ob ti’ u jejeláasil jala’acho’ob ku meyajo’obe’ ka beeta’ak, tu séeba’anil ku páajtale’, tuláakal ba’ax najmal u beeta’al ti’al u kaláanta’al u toj óolal u máasewal kaajilo’ob ti’ Amazonas, yóok’lal u k’oja’anil COVID19, tumen le je’elo’, kaajo’ob tu’ux talam yanili’ kuxtal ichil América Latina. Ts’íibe’ táakmuk’ta’ab tumen uláak’ máako’ob k’ajóoltano’ob, je’el bix Brad Pitt, Meryl Streep, Gilberto Gil, Caetano Veloso, Pedro Almodovar, Madonna yéetel Paul McCartney.

U máasewal kaajilo’ob Brasile’, kuxa’ano’ob ichil u sajbe’entsil u kuxtalo’ob je’el bix suukile’, yóok’lal u pandemiail COVID19. Ts’o’ok u máan jo’op’éel siglos káajik u máansiko’ob talamilo’ob úuchik u taasal u jejeláasil k’oja’ano’ob tak tu kaajalo’ob tumen le sak wíiniko’ob. Le beetike’ ya’abach ti’ u kajnáalo’obe’, ch’éejo’ob. Ba’ale’, walkila’, le túumben k’oja’ana’ ts’o’ok u k’i’itbesikubáaj ichil u k’áaxil Brasil, ts’o’okole’ wa ka k’uchuk okol ichil u máasewal kaajilo’obe’, je’el u beetik u sa’atal wa jayp’éel ti’ le je’elo’obo’, tumen yaane’ jach u jumpáaykunsmajubáajo’ob ichil u k’áaxil Amazonas, beey ts’íibta’an te’e ju’uno’, tu’ux ts’o’ok u ts’íibitik u k’aaba’ maanal ti’ 130 mil u túul