Sajbe’entsil yanik u péetlu’umil Yucatán yóok’lal mola’ayob konik u bak’el k’éek’en: Greenpeace México

La Jornada Maya
Oochel: Greenpeace México
K'iintsil

Mérida, Yucatán
Martes 12 ti' mayo, 2020

U seen yantal u mola’ayilo’ob tséentik yéetel konik u bak’el k’éek’en tu noj lu’umil Yucatáne’ ku beetik u jach úuchul loob ti’ máasewal kaajo’ob yéetel ti’ u k’áaxilo’ob: ti’ le 257 u p’éel granja yaan ti’ u péetlu’umil Yucatáne’, u 90 por cientoile’ mina’an u ju’unil tu’ux ku ya’alal ku ts’a’abal u páajtalil u meyaj te’e k’áax tu’ux yano’obo’. Le je’ela’ u k’áat u ya’alej, mina’an le ju’un ku k’aaba’tik

Manifiesto de Impacto Ambiental (MIA), tumen kex 43 u p’éel granjase’ ti’ jeets’el ich k’áaxo’ob kaláanta’an, ts’o’okole’ le jach táan u to’opole’ leti’e’ k’ajóolta’an beey anillo de cenotes, tumen ti’ jeets’el 33 u p’éelal, beey chikbesa’ab ti’ jump’éel xak’al xook jts’a’ab k’ajóoltbil tumen Greenpeace: “Bak’el táan u jaantik klu’umil” Ba’ax yaan tu paach u mola’ayilo’ob konik u bak’el k’éek’en tu Péetlu’umil Yucatán.

Ti’ jump’éel k’a’aytajil tsikbal beeta’ab ti’ Internet tumen le múuch’kabilo’, tu ts’áaj k’ajóolbtil ba’ax le ojéelta’abo’, yéetel tu ya’alaj ti’al ka páatak u beeta’ale’ táakbesa’ab kajnáalo’ob tu’ux táan u yúuchul k’aas yóok’lal granjas, beyxan u múuch’il Indignación.