Coreaobe' ku múul xíimbalo'ob

Juegos Olímpicos de Invierno ku ts’áak alab óol ti’al ka yanak jets’eknakil

Afp
Oochel Dpa
K'iintsil

Lunes 12 ti' febrero, 2018

Máax jo’olbesik Corea del Norte, Kim Jong-un, tu páayt’antaj sábado máanik yéetel jump’éel k’uben ts’íibe’, u jala’achil Corea del Sur, Moon Jae-in, ti’al ka táakpajak ti’ múuch’tambal yaan u beeta’al Pyongyang. U kaajil Washington tu ya’alaj ma’atáan u táakpajal ti’al ka k’as náats’ak ti’ le ka’ap’éel noj lu’umo’obo’.

Páayt’aane’ beeta’ab tumen Kim Yo-jong, u kiik norcoreano jo’olpóop, máax tu xíimbaltaj Corea del Sur yo’olal keetil báaxal Juegos Olímpicos de Invierno de Pyeongchang-2018, beey uchik u ya’alal tumen u kúuchil k’a’aytajil sudoreana lu’umil.
Jo’olpóol norcoreanoe’ tu ya’alaj leti’e’ je’el u yóotik u múuch’ikubáaj yéetel Moon jach tu séebanil.

Wa tumen ka úuchuke’, leti’ u yóoxtenil kéen beeta’ak múuch’tambal je’el bix le je’elo’ uchak u yáax much’ikubáaj u yuumil máax beetik u norcoreano jo’olpóopil walkila’, Kim Jong-il, tu noj kaajil Pyongyang yéetel sudcoreano jo’olpóopilo’ob Kim Dae-jung yéetel Roh Moo-hyun tu ja’abil 2000 beyxan 2007, je’el bix uchiko’.

Ba’ale’ múuch’tambale’ je’el u beetik u k’as yantal keetil ichil Moon, máax ts’o’ok u chan máan k’iin káajak u k’áatik ka béeyak u yantal tsikbal ichil Xaman, yéetel u jala’achil Estados Unidos, Donald Trump, máax ts’o’ok u sakach t’aan yéetel ts’o’ok tak u ya’alik je’el bin u beetik jump’éel nuclear ba’ateltáambal yéetel Kim.

Washington táan u k’áatik ka’aj e’esak tumen Pyongyang, ma’ili’ yáax yanak tsikbale’, je’el u yóotik u tselik u atómico militar tuukul. Ma’ seen úuche’ Kime’ tu ya’alaj noj ba’al u ti’al u jets’ik u noj lu’ume’ “jump’éel nuclear Lu’umil yaan u páajtalil”.

Máan k’iin mixba’al a’alab tumen Corea del Norte yo’olal wa yaan u táakpajal tu ketlamil báaxalo’ob Juegos Olímpicos de Pyeongchang, ba’ale’ tu ts’ooke’ tu jets’aj yaan u túuxtik atletas, artistas, animadoras yéetel jumúuch’ máak jach kaambanaja’ano’ob.

Jo’oljeake’ Moon jaan yéetel máax jo’olbesik Estado de Corea del Norte, Kim Yong-nam yéetel Kim Yo-jong, yáax máax ti’ ch’i’ibal táan u beetik u jala’achil Norte pe’echat sudcoreano lu’umil uchak u máan u ba’ateltáambalil Corea (1950-53).

Ka’awjeake’ Kim Yo-jong bin u cha’ant u ketil báaxal ko’olel ti’ hockey sobre hielo ti’ Juegos Olímpicos.

Máax beetik u portavozil Moon, Kim Eui-kyeom tu ya’alaje’, Kim Yo Jong túuxta’ab ti’al u k’ubik jup’éel k’uben ts’íib beeta’an tumen u suku’un tu’ux ku ts’íiboltik ka ma’alo’obchajak bix yanik ba’al ichilo’ob.

Páayt’aane’ táan u yantal kex ts’o’ok u máan ka’ap’éel ja’ab k’as talam yanik ba’al te’e péetlu’umo’. Te’e k’inako’obe’, u lu’umil Pyongyang tu yilaj bix u meyajta’al nuclear ba’alo’ob. U ts’ooke’ jach k’a’ame’ beeta’ab septiembre máanik. Jala’ache’ ku ya’alik yaan u páajtalil u túuxtik nuclear bomba je’el tak u k’uchil tu lu’umil Estados Unidos.

Moon ma’ tu ya’alaj ma’alo’ob jach tu séebanil, ba’ale’ tu k’áataj ka yanak uts ba’al yéetel tu ka’aj béeyak u t’aan xaman ti’al ka kaxta’ak bix je’el u páajtal u tsikbalo’ob yéetel Washington.