Polaakoilo'obe' ku yóok'ostiko'ob cafetalero cumbia

Colombiae' máan yóok'ol Polonia, 3 - 0

Agencias
Oochel fifa.com
K'iintsil

Lunes 25 ti' junio, 2018

Yo’olal u jach utsil núup’il James-Quintero, u múuch’ báaxalil Colombiae’ tu lots’aj 3 - 0 u múuch’il Polonia tu k’iinil domingo, ti’ le báaxal jbeeta’ab tu noj kaajil Kazán. Beey úuchik u yantal u ki’iki’ óolalil Grupo H ichil u keetil Mundial Rusia 2018, tumen yéetel le je’elo’, Colombianoilo’obe’ ku páajtal u náaytik u máano’ob ti’ u yáax ts’ook jaatsil báaxal wa octavos de final.

Ch’iin yéetel le j-oksa’ab gole’, jbeeta’ab tu minutoil 40e tumen jbáaxal Yerry Mina, Radamel Falcao García (69) yéetel Juan Guillermo Cuadrado (75), kex tumen ma’ ma’alo’ob úuchik u máan yáax báaxal tu táan Japón, martes máanik tu kaajil Saransk.

U noj lu’umil Colombiae’, ti’ yaan tu yóox kúuchil ichil le múuch’ báaxalo’ob ku ketikuba’ob ichil Grupo H, tumen ts’o’ok u much’ik óoxp’éel puntos, ka’alikil Poloniae’ ts’o’ok u jóok’sa’al tumen ma’ tu náajaltaj mix jump’éel punto.

Ts’ook báaxal yéetel le bíin je’ets’ek bix kéen p’áatak ba’al te’e múuch’ilo’, yaan u beeta’al jueves ku taala’, yéetel ka’ap’éel báaxalo’ob: Colombia-Senegal tu kaajil Samara yéetel Polonia-Japón tu kaajil Volgogrado.

Je’el bix yáax a’alab tumen José Pekerman yéetel Adam Nawalka, báaxal ken u beeto’obe’ ma’ chéen ch’a’abil ti’al mix máaki’, tumen ti’ tuláakalo’obe’ k’a’anan u much’iko’ob puntos úuchik u yáax lo’ots’olo’ob (2-1) tu táan Japón yéetel Senegal ka yáax báaxanajo’ob.

Ba’ale’ úuchik u kaniko’ob múul báaxal James Rodríguez yéetel Juan Fernando Quintero, u múuch’il Colombiae’ tu kaxtaj u súutukil, tu kanaj kóochak’ yéetel tu yoksaj gol ti’al ka béeyak u ts’áako’ob jump’éel chan xáak’ab ti’al u bin u náats’alo’ob ti’ uláak’ u jaatsil báaxal.