Úuch ba'ax k'a'aytabij: cha'anta'ab u lúubul belgas tumen galos

Bejla'a u yojéelta'al máax yéetel ku báaxta'al u ts'ook keetil

Agencias
Oochel fifa.com
K'iintsil

Miércoles 11 ti' julio, 2018

U múuch’il báaxal u noj lu’umil Franciae’, leti’e’ yáax jeets’el u máan ti’ u ts’ook báaxalil Copa del Mundo, yaan y beeta’al tu k’iinil domingo ku taala’. Kex beyo’, u múuch’ báaxalil Bélgicae’ yaan u yantal u ketikubáaj ti’al u kaxtik u p’áatal yéetel u yóox kúuchil le noj báaxala’. Ba’ale’, yaan u yojéeltiko’ob máax yéetel kun báaxalo’ob, le kéen ts’o’okok keetil ichil Croacia yéetel Inglaterra, tu kúuchil estadio Luzhniki.

Kex tumen Bélgicae’ tu ye’esaj óol ka’anal u báaxalo’ob tu yóok’ol Francia ti’ u yáax jaatsil báaxale’, ma’ páatchaj u yoksik mix jump’éel gooli’. Úuchij u káajal u ka’a jaatsil báaxale’, je’epaj marcador ti’al u yutsil Francia, tu minutoil 51, úuchik u k’óoch ch’inta’al wóolis tumen defensa central, Samuel Umtiti, ti’al u yokol ichil porteria. Beey túuno’, Bélgicae’ péeknaj ti’al u kaxtik xan u goolil ba’ale’ ma’ béeychaj u yoksiki’, tumen jach ma’alo’ob u báaxal u defensail Francia.

U yóoxtenil u ketikubáaj Francia ti’ jump’éel ts’ook báaxal ichil Copa del Mundo. Tu ja’abil 1998 tu náajaltaj u jach nojochil chíimpolalil báaxal, ja’ab úuchik u k’amil le noj keetila’.

Bejla’a u yojéelta’al máax yéetel ken u ketubáaj ti’ le ts’ook báaxalilo’, le kéen ts'o'okok keetil ichil Croacia yéetel Inglaterra.