Pech' óolal yéetel óotsilil tu paach máasewáalo'ob

Jafet Kantún
Oochel Cuartoscuro
K'iintsil

Jueves 9 ti' agosto, 2018

Walkil 26 ja’abo’ob paachile’, jump’éel k’iinil 9 ti’ agostoe’, yáax juntéen úuchik u beeta’al u múuch’táambalil Máasewal Kaajo’ob ichil Subcomisión de Prevención de Discriminaciones y Protección a las Minorías ti’ ONU. Tu paach ka’ap’éel ja’abe’, 1994, u múuch’kabil Organización de las Naciones Unidas tu ya’alaj ka je’ets’ek le k’iina’ beey u Máank’inal Máasewáal Kaajo’ob, ichil u meyajil Decenio Internacional de los Pueblos Indígenas en el Mundo (1995-2004). Lik’ul u ja’abil 1995, káaj u máank’inta’al lalaj 9 ti’ agosto.

Le k’iina’, ku meyaj ti’al k k’a’ajsik u noj ba’alil, u jejeláasil miatsil yéetel bix u na’ata’al yóok’ol kaab tumen maanal 370 millonesil máasewáal máako’ob yano’ob yóok’ol kaab, t’oxa’ano’ob ichil maanal 90 u p’éel noj lu’umo’ob.

Ti’ le k’iino’oba’, u kuxtal máasewáal kaajo’obe’ sajbe’entsil yanik, beey úuchik u ya’alik António Guterres úuchik u t’aan tu yóok’olal le máank’inala’. Sáansamale’, máasewáal kaajo’obe’, ku kaxtiko’ob bix u jóok’olo’ob táanil ichil ba’ax ku jaajkúuntiko’ob, tumen mants’ k’a’abéet u yilko’ob bix u kuxtalo’ob ichil u k’áaxo’ob kex ttumen táan u k’askúunta’al ti’ob wa tumen táan u jóok’sa’alo’ob tumen naats’ yaniko’ob ti’ u xuulo’ob lu’um.
Yóok’olal le je’elo’, máasewáal kaajo’ob yaan yóok’ol kaabe’, suuk u ja’atsalo’ob ichil máaxo’ob asab óotsilo’ob wa ku ke’etel yéetel máax ma’ máasewáali’, ts’o’okole’ u xookil bix u yéensa’al óotsilil ti’ máasewáal kaajo’obe’, asab xaan u bin, le beetik ku talamchajal, beey úuchik u chikpajal ti’ u xak’al xookil “Pueblos Indígenas. Pobreza y Desarrollo”, tu ja’abil 2014.

Máasewáal kaajo’obe’ ku chikbesiko’ob u yóox jaatsil tuláakal óotsil máako’ob yaan yóok’ol kaab, ts’o’okole’ unaj xan u kaxtik bix u beetiko’ob yóok’olal pçeech’ óolal ku yantal, ma’ chéen ti’ ba’alo’ob yaan u yil yéetel mola’ayo’ob, tumen ma’atech u táakbesa’alo’ob ichil a’almaj t’aano’ob, mix ti’ ba’alo’ob ku beeta’alo’ob, mix najil xooko’ob mix le kéen jo’op’ok u kaxta’al u yuumil ti’al ka beeta’ak wa ba’ax meyajil.

Tu noj lu’umil Méxicoe’, yaan u jejeláasil miaatsilo’ob, maanal ti’ 7 millonesil máako’ob ku t’aniko’ob jump’éel máasewáal t’aan. Le je’elo’ ku chikbesik u 6.5 por cientoil tuláakal máax kaja’an ti’ le noj lu’uma’. U ya’abile’ náhuatl, maaya’ob, tzeltales wa mixtecos, beey je’ets’ik tumen Inegi, tu ja’abil 2015.

Máasewáal kaajo’ob ti’ le noj lu’uma’, ma’ jumpáay yanik ti’ talamilo’ob ku máansik uláak’ máako’ob je’el bix leti’ob ti’ yóok’ol kaab. Óotsil kuxtal yéetel péech’ óolale’, leti’e’ talamilo’ob ku máansiko’ob ichil u kuxtalo’ob sáansamal.

Ichil uláak’ ba’alo’ob jets’a’an tumen Inegie’, jump’éel k’áat chi’ yóok’olal péech’ óolale’, tu chikbesaj tu ja’abil 2017e’ máasewáal máako’obe’, ti’ yanchajo’ob tu ka’a kúuchil ichil le máaxo’ob ma’atech u jach chíimpolta’al u páajtalilo’ob, chéen máansa’ano’ob tumen u xmeyajilo’ob ichnaj ku bo’ota’alo’ob. Óoli’ u chúumukil máasewáalo’obe’ (49. 3 por ciento) tu ya’alajo’obe’ ma’atech u chíimpolta’al u páajtalilo’ob.

Yóok’olal le je’elo’, k’a’anan u jach chíimpolta’al ba’ax ts’o’ok u béeykunsa’al tu yutsil máasewáalo’ob, tumen jach táaj k’a’anantako’ob. Jayp’éel ja’abo’ob paachile’, jach k’a’ayta’ab ba’ax béeykunsa’ab tumen juntúul chan xch’úupal tarahumarail, máax tu náajaltaj ultramaratón 50 kilómetros u chowakil, kex tumen mina’an u nu’ukulil ti’al u beetik, chéen yéetel u xk’éewel xanab yéetel falda.

Beyxan ti’ yaan Rodrigo Tod, juntúul máasewal guatemaltecoil máax náajalt Premio Ambiental Goldman 2017 (ku tukulta’ale’ leti’ u Nobelil Ecología) úuchik u ba’atel tu táan jump’éel noj mola’ay minera ti’al beyo’ u tokik u k’áaxilo’ob ti’ob.

Beyxan ti’ klu’umile’, maaya ko’olel, Irma Yolanda Pomol Cahum, tu náajaltaj walkil ka’ap’éel ja’abo’obe’ u chíimpolalil Premio Nacional de la Juventud 2016.