Múuch' e'esajil ts'a'aban tu kúuchil MAMe' ku chikbesik mexicano óol

Ku ye'esik ba'ax meyajta'ab ichil siglo XIX yéetel XX

Daniel López Aguilar
Boonil Cortesía del MAM
K'iintsil

Lunes 12 ti' noviembre, 2018
U Noj Kaajil México

Jump’éel xíimbal ku jéets’el ti’ mexicano its’at beeta’an tu siigloil XIX yéetel XX, tu’ux ku chikbesa’al jejeláas ba’al yaan u yil yéetel u nojochil ka’an, ko’olel, oochel yéetel meyajil nook’o’ob, leti’ u nooyil u ye’esajilo’ob Galaxias, El espejo de Venus, Sumario de fotógrafos yéetel Tapices, ts’a’abano’ob ti’ u kúuchil Museo de Arte Moderno (MAM) tu Noj Kaajil México.

E’esajilo’obe’ j ts’a’abo’ob k’ajóoltbil tu k’iinil viernes máaniko’, yéetel múul beeta’ab u curaduriail tumen Gonzálo Vélez yéetel uláak’ u meyajilo’ob u kúuchil MAM.

“Ti’ le k’iino’ob tu’ux táan u yúuchul meyaja’, táan u táanilkunsa’al e’esajil mantats’ p’aatal, tumen le je’elo’ jump’éel noj ba’al chikbesik u yóol mexikanilo’ob”, beey úuchik u ya’alik Sylvia Navarrete, máax jo’olbesik le kúuchil e’esajilo’.

“Ti’ le jaatsila’ yaan boono’ob, póol meyajo’ob, oochelo’ob yéetel nojoch nook’o’ob -tu ya’alaj- tu’ux ku chikbesa’al jejeláas ba’alo’ob, ts’o’okole’ ku k’áattáantik ti’ máaxo’ob cha’antik ka chíimpolta’akob beey its’at meyajo’ob yéetel beey uláak’ bix u tuukul yéetel uláak’ bix u yila’al ba’al tumen máak.”

Navarrete yéetel Véleze’ leti’e’ máaxo’ob jo’olbes u xíimbalil cha’an beeta’ab yéetel kúuchilo’ob k’a’aytiko’ob péektsil.

"Galaxia’obe’ u múuch’il astros; u múuch’il eek’o’ob ku núup’ulo’ob tumen naats’ yaniko’ob. Le keetil je’elo’ ku chikbesik tu beel le jaatsil meyaj beeta’an tu k’ajla’ayil its’at ti’ u noj lu’umil México ichil siglo XX. Te’e xíimbalila’ ku chikpajal noj eek’o’ob tu ki’ikunsajo’ob u meyajil plástica México", tu ya’alaj curador Gonzalo Vélez.

Maanal ti’ 200 u p’éel boono’ob, woojo’ob yéetel póol meyajo’ob ku múuch’ul ti’ u ye’esajil Galaxias, u meyaj 70 aj its’ato’ob k’ajóolta’ano’ob, je’el bix Mardonio Magaña, Xavier Guerrero, José Chávez Morado, Roberto Montenegro, Pedro Coronel yéetel Juan Soriano, beyxan táaka’an uláak’ táanxel máako’ob chikpaja’an u meyajo’ob ti’ le noj lu’uma’, ts’o’okole’ jujump’íitil úuchik u bin u táakbesa’alo’ob ti’ u ye’esajil MAM.

Te’e kúuchilo’ ku jach chikpajal boono’ob beeta’ano’ob yóok’ol nook ku k’aaba’tiko’ob La función del mago (lagarto), animal fantástico (1973) yéetel Peces y tortugas (1972), beeta’an tumen Francisco Toledo.

Tu ye’esajil El espejo de Venus ku mu’uch’ul 63 boono’ob, póol meyajo’ob yéetel u meayjil gráfica, beeta’ab ichil u ja’abilo’ob 1914 yéetel 2000, tumen Diego Rivera, Lola Álvarez Bravo, Graciela Iturbide, Rufino Tamayo, Rosa Rolanda yéetel Joy Laville, ichil uláak’o’ob.

Te’e jaatsila’ ku xak’alta’al u yóol ko’olel yanchaj ichil siglo XX, jóok’sa’an ukp’éel jaats ti’: Mujer ilustre, Mujer erótica, Mujer compañera, Mujer retratada, Mujer y opresión, Mujer e indigenismo yéetel Mujer y modernidad.

U meyajil oochel yéetel nook’o’ob beeta’an tumen 46 aj its’ato’ob

U ye’esajil Sumario de fotógrafos u much’maj u meyaj 46 aj its’ato’ob (máaxo’ob táakano’ob ti’ acervo beeta’an MAM, tu’ux yaan maanal ti’ 800 oochelo’ob jóok’sa’an tumen 70 máako’ob), beyxan yaan uláak’ meyajo’ob p’ata’ab tumen Manuel Álvarez Bravo ti’ meyaj u beetmaj albúminas, ambrotipos yéetel daguerroti tu ts’o’obal siglo XIX.

Beey túuno’, tu kúuchil Fernando Gamboa yaan ichil MAMe’, ts’a’aban Tapices, e’esajil tu’ux ku múuch’ul meyajo’ob beeta’an ichil u ja’abilo’ob 1954 yéetel 1988, tumen Lola Cueto, Marta Palau, Carlos Mérida, Ivonne Charlín yéetel Cecilia Martínez, beyxan tumen Fritz Riedl yéetel José Nuño.

U ye’esajilo’ob Galaxias, El espejo de Venus, Sumario de fotógrafos yéetel Tapicese’, ts’a’abano’ob ti’ u kúuchil Museo de Arte Moderno (Paseo de la Reforma s/n y Gandhi, Bosque de Chapultepec, primera sección, estación Chapultepec del Metro), yaan u luk’sa’al tak marzo ti’ u ja’abil 2019.